Astanalyqtar 2 aptada úıli bola alady

ASTANA. KAZINFORM — «Otbasy bank» usynǵan baǵdarlama 30 jeltoqsanǵa deıin ótinim qabyldaıdy. Bul týraly «Búgin LIVE» stýdııasyna qonaq bolǵan turǵyn úı sarapshysy habarlady. 

— Qazirgi tańda Astana qalasynda 30/70 baǵdarlamasy boıynsha úı alý úshin syıaqy mólsherlemesi de talap etilmeıdi. Mysaly, ádette úı alý úshin shotta 14 aı boıy aqsha jınaqtalýy qajet. Alaıda qazir «Otbasy bankte» shoty 18 aı boıy ashyq turǵan, alaıda ishine birde-bir teńge salmaǵan azamattar úshin arnaıy múmkindik bar. Bul baǵdarlama Jańa jyl qarsańynda, tek 30 jeltoqsanǵa deıin ǵana qoljetimdi. Baǵdarlamanyń ereksheligi — jınaq múlde qajet emes. Bastapqy jarnany búgin salyp, birden úı alýǵa bolady. Úıdi tek «Otbasy bank» bekitken ataýly qurylys kompanııalarynan ǵana satyp alýǵa ruqsat etiledi. Ol kompanııalardyń naqty tizimin «Otbasy bankke» baryp bilýge bolady. Sonymen qatar, bul baǵdarlamada zeınetaqy jarnalaryna da qaramaıdy. Eń basty talap — QR azamatynyń «Otbasy bankte» 18 aı boıy shoty bolýy. Rásimdeý ýaqyty shamamen 2 apta, — deıdi Arýjan Úısinbaı.

Úı alamyn degen jandar úshin «Otbasy bank» taǵy bir baǵdarlama usynady.

— 50/50 baǵdarlamasy kóbine mynadaı jaǵdaıdaǵy adamdarǵa arnalǵan: keı azamattar «úıimdi sattym, qolymda bastapqy jarna bar, 30 mıllıon teńgelik úı alǵym keledi, onyń 15 mıllıonyn qazir tóleı alamyn, biraq 6 aı kútkim kelmeıdi, sebebi 6 aıdan keıin úı baǵasy qymbattap ketedi» dep jatady. Dál osyndaı qolynda bastapqy jarnanyń 50 nemese 30 paıyzy daıyn turǵan jandar úshin bul baǵdarlamalar óte tıimdi. 30 jeltoqsanǵa deıin úlgerýge bolady. Qazirgi tańda biz 3 otbasyǵa kómektestik. Olar kútpeı-aq, 2-3 bólmeli páterlerin alyp jatyr. Biraq bul baǵdarlamada bastapqy jarnanyń bolýy mindetti. Sebebi bastapqy jarna bolmasa, adamdar eki jaqqa birdeı nesıe tólep, qarjylaı qıyndyqqa tap bolýy múmkin, — deıdi sarapshy.

Eske sala keteıik, 1 qańtardan bastap óńirlik ıpotekalardyń bastapqy jarna sertıfıkaty 2,5 mln teńgege ósedi.