Astanadan ushatyn Fly Dubai reısteri toqtatyldy

ASTANA. KAZINFORM – Astana halyqaralyq áýejaıy Fly Dubai jáne Air Astana áýekompanııalarynyń reıster kestesindegi ózgerister týraly habarlady.

Áýejaıdyń habarlaýynsha, Fly Dubai áýekompanııasynyń búginge ushyp kelýge josparlanǵan FZ1303 jáne FZ1307 reısteri, sondaı-aq ushýǵa josparlanǵan FZ1304 jáne FZ1308 reısteri toqtatyldy.

Sonymen qatar Air Astana áýekompanııasynyń Dýbaı–Astana baǵytyndaǵy keshiktirilgen keshegi KC2060 reısi búgin ushyrylady.

«Tańerteń saǵat 07:25-te Astana-Dýbaı baǵyty boıynsha KC205 reısi júrgizildi. Atalǵan reıs Astana qalasyna túngi ýaqytta ushyp keledi. Jolaýshylar reıster týraly aqparatty jáne olardyń kestedegi yqtımal ózgeristeri týraly málimetti áýekompanııadan, sondaı-aq Astana halyqaralyq áýejaıynyń resmı saıtynan www.nn-airport.kz nemese táýlik boıy jumys isteıtin baılanys ortalyǵynan 8 (7172) 702-999 bile alady», - dep habarlady áýejaıdyń baspasóz qyzmeti.

Eske sala keteıik, Birikken Arab Ámirlikterinde nóser jaýyp, kósheler men ǵımarattardy sý alyp ketken bolatyn.

Aýa raıynyń qolaısyzdyǵyna baılanysty Dýbaı halyqaralyq áýejaıynda kem degende 17 turaqty reıs toqtatylǵan. Reıstiń toqtatylýy, keshigýi jáne baǵytyn ózgertý kúni boıy tirkelip jatyr.