Astanadaǵy Grand Slam týrnıri: Erteń kimder beldesedi

ASTANA. KAZINFORM – Astanada ótip jatqan dzıýdodan Qazaqstan Barysy Grand Slam jarysynyń ekinshi jarys kúni tatamıge erlerden eki, áıelderden eki salmaqta balýandar ózara myqtyny anyqtaıdy.

Atap aıtsaq, erteń erler arasynda 73 jáne 81 keli salmaqta, al áıelder arasynda 63 jáne 70 kelidegi dzıýdoshylar synǵa túsedi.

Erler arasynda 73 kelide el namysyn Jansaı Smaǵulov, Danııar Shamshaev, Asqar Narqulov, Baqytjan Ábdirahmanov qorǵasa, 81 kelide Abylaıhan Jubanazar, Rýslan Musaev, Jalǵas Qaırolla, Mádı Amangeldi tatamıge shyǵady.

Al áıelder arasynda 63 klide el namysyn Esmıgúl Kýıýlova, Samalaı Erǵalıeva, Krıstına Sotnıkova, Zarına Sarıpova qorǵasa, 70 kelide Ekaterına Tokareva, Anastasııa Maıakova, Anastasııa Morozova synǵa túsedi.

Aıta keteıik, elorda tórinde ótip jatqan bul jarysta Parıj Olımpıadasynyń sońǵy lıtsenzııalary sarapqa salynyp jatyr. Atalǵan dodaǵa álemniń 92 elinen 519 tatamı sheberi qatysyp jatyr. Synǵa túsip jatqan balýandardyń qatarynda 3 Olımpıada, 13 álem chempıony bar.

Bul básekeniń nátıjesinde IJF erejelerine sáıkes jarystyń jeńimpazdary men júldegerleri arasynda álemdik jáne olımpıadalyq reıtıngilerde upaılar bólinedi. Atap aıtqanda, І oryn úshin 1 000, ІІ oryn úshin 700, al ІІІ oryn úshin 500 upaı esepteledi.

Esterińizge sala keteıik, osyǵan deıin qyzdar arasynda Ǵalııa Tynbaeva qazaq qyzdary arasynan tuńǵysh ret Grand Slam týrnıriniń chempıony atansa, erler arasynda 60 keli salmaqta Olımpıada oıyndarynyń eki dúrkin júldegeri Eldos Smetov óz elimizdegi jarysty qola medalmen aıaqtady.