Aıda Balaeva: Jas qalamgerlermen ádebıettegi ózekti máselelerdi talqylaý – zaman talaby
ASTANA. KAZINFORM - QR Ulttyq akademııalyq kitaphanasynda jastar ádebı klýbynyń alǵashqy basqosýy ótti. Oǵan elmizdiń ár aımaǵynan kelgen 18-35 jas aralyǵyndaǵy jas qalamgerler, «Daryn» memlekettik jastar syılyǵynyń, Prezıdenttiń arnaıy ádebı syılyǵynyń laýreattary, halyqaralyq, respýblıkalyq ádebı baıqaýlardyń jeńimpazdary qatysty.
Mádenıet jáne aqparat mınıstrligi janynan qurylǵan jastar ádebı klýbynyń maqsaty – qazaq ádebıetindegi ózekti máselelerdi, jańa ádebı tendentsııalar men shyǵarmalardy talqylaý, avtorlardy nasıhattaý.
«Memleket basshysy Ulttyq quryltaıda jalpy jastar tárbıesi, onyń ishinde kitaphanalardy damytý, jalpy kitap oqý máselelerin qolǵa alýǵa qatysty naqty tapsyrmalar berdi. Túptep kelgende negizgi maqsat – ult rýhanııatyn damytý, sapaly urpaq ósirý. Óıtkeni, kitap oqıtyn bala rýhanı dúnıesi baı azamat bolyp óseri anyq. Bar ónerdiń túp negizi – ádebıet. Sondyqtan jas qalamgerlerge ortaq alań usynyp, ádebıettegi ózekti máselelerdi talqylaý – zaman talaby», - dedi Mádenıet jáne aqparat mınıstri Aıda Balaeva.
Otyrysta klýbtyń kún tártibi bekitilip, basshylyq quramy jasaqtaldy, aldaǵy josparlary aıqyndaldy. Jıynǵa qatysýshylar zamanaýı ádebı protsess pen aýdarma salasyna, kitap shyǵarý jáne baspa isine, balalar ádebıetin damytýǵa qatysty ózekti máselelerge qatysty oılaryn ortaǵa salyp, túrli usynystaryn aıtty. Sondaı-aq ádebı agenttik, otandyq avtorlardyń shyǵarmalaryn nasıhattaý, kitap oqý mádenıetin qalyptastyrý tóńireginde birqatar máseleler kóterildi.
«Jas qalamgerlerge qoldaý kórsetýde búgingi basqosýdyń mańyzy zor dep esepteımin. Jańa ádebı klýb qazaq ádebıetiniń damý kókjıegin keńeıtip, ult rýhanııatynyń damýyna óz septigin tıgezedi dep oılaımyn», - dedi memlekettik «Daryn» jastar syılyǵynyń ıegeri, synshy-ádebıettanýshy Baǵashar Tursynbaıuly.
Aldaǵy ýaqytta ádebı klýbtyń otyrysy elimizdiń ózge de aımaqtarynda kóshpeli negizde uıymdastyrylady.
