Astanada jasyryn nasybaı óndiretin jerasty tsehtar anyqtaldy
ASTANA. KAZINFORM – Elordada 18 naýryzdan beri veıp pen nasybaıdyń zańsyz taralýy men qoldanylýyn anyqtaý boıynsha reıdter jalǵasyp jatyr. Reıdtik is-sharalar bastalǵannan beri 800-ge jýyq saýda orny tekserildi. Bul týraly Astana qalalyq ákimdiginiń baspasóz qyzmeti habarlady.
Málim bolǵandaı, shegilmeıtin temeki ónimderin, onyń ishinde nasybaı óndirisi boıynsha jerasty tsehtaryn izdeý barysynda 160-tan astam fakt anyqtalǵan.
Aktsııanyń maqsaty – veıpke, temeki ónimderine jáne nasybaıǵa táýeldi elorda turǵyndarynyń sanyn azaıtý.
Reıdke belgili MMA jaýyngeri, kóptegen halyqaralyq týrnırlerdiń jeńimpazy Vasılıı Tahtaı qatysty.
«Biz biletindeı, búgingi tańda temeki ónimderi men nasybaıdy paıdalaný bizdiń qoǵamda ózekti másele bolyp sanalady. Búginde kámeletke tolmaǵandarǵa nasybaı men basqa da temeki ónimderin zańsyz satýdy anyqtaý maqsatynda reıd júrgizilýde. Bizdiń maqsatymyz – bul máseleni joıý jáne jastardy salaýatty ómir saltyna baǵyttaý», - dedi Vasılıı Tahtaı.
Іs-shara barysynda dúken satýshylaryna profılaktıkalyq túsindirý jumystary júrgizildi.
«Osy jyldyń 18-29 naýryzy aralyǵynda biz nasybaı men temeki ónimderin zańsyz satýdy anyqtaý boıynsha reıd júrgizip jatyrmyz. Іs-shara barysynda Asfendııarov, Ánet baba, Syǵanaq, R.Baǵlanov, Uly dala, Qaıym Muhamedahanov, Otyrar jáne Úrker turǵyn alaby, Isataı batyr kóshelerinde ornalasqan 147 dúken boıynsha nasybaı men snıýsti zańsyz satý boıynsha profılaktıkalyq túsindirý jumystary júrgizildi. Nátıjesinde 6 dúken ákimshilik quqyq buzýshylyq týraly kodekstiń (ÁQBtK) 196-babyna sáıkes 25 aılyq eseptik kórsetkish mólsherinde aıyppul salýmen ákimshilik jaýapkershilikke tartyldy», - dedi Nura aýdany ákimi apparatynyń kásipkerlik bóliminiń mamany Bektemir Joldasqajıev.
Esterińizge sala keteıik, Memleket basshysy Qasym-Jomart Toqaev 2024 jylǵy 15 naýryzda Ulttyq quryltaıdyń úshinshi otyrysynda Esirtki men qazaqstandyqtardyń densaýlyǵyna zııandy basqa da zattardyń zııany týraly aıtqan bolatyn.Nasybaı men snıýstiń zańsyz taralýyn anyqtaý boıynsha reıdter elordanyń barlyq aýmaǵynda júrgizilip jatyr.
