Astanada Jańarý kúni dúnıege kelgen sábılerge syılyq berildi
ASTANA. KAZINFORM — «Naýryznamanyń» onkúndigi aıasynda atap ótiletin Jańarý kúnine oraı elordanyń Esil aýdanyndaǵy № 2 kópsalaly qalalyq aýrýhanada saltanatty is-shara ótti, dep habarlaıdy Astana ákimdiginiń resmı saıty.
Bastama otbasylyq qundylyqtardy nyǵaıtýǵa jáne ómirdiń alǵashqy kúnderinen bastap ekologııalyq mádenıetti qalyptastyrýǵa baǵyttalǵan.
— Іs-shara aıasynda jańa týǵan sábıler men olardyń ata-analaryna arnaıy quttyqtaý hattary tabystaldy. Onda QR-kod arqyly balanyń dúnıege kelýine oraı otyrǵyzylatyn ataýly aǵashtyń naqty ornalasqan jeri kórsetilgen. Osylaısha, árbir otbasy bolashaqqa degen qamqorlyq arqyly urpaqtardy biriktiretin sımvolıkalyq ekologııalyq aktsııanyń bir bóligine aınaldy, — dedi Astana qalasy Esil aýdanynyń ákimi Darmenııar Qydyrbekuly.
Sonymen qatar, zamanaýı sheshimderge erekshe kóńil bólindi: jańa týǵan sábılerge «tsıfrlyq besikter» tabystaldy. Bul — memlekettik qoldaýdyń, ınnovatsııalyq kózqarastyń jáne óskeleń urpaqqa degen qamqorlyqtyń sımvoly.
Ákimdiktiń málimetinshe, «Jańa ómir — jańa aǵash» bastamasy is-sharaǵa erekshe mazmun berip, balanyń dúnıege kelýi men el damýy arasyndaǵy baılanysty aıqyndady. Ataýly aǵash otyrǵyzý — urpaq sabaqtastyǵynyń, qorshaǵan ortaǵa janashyrlyqtyń jáne ár otbasynyń turaqty bolashaqqa qosqan úlesiniń kórinisi boldy.
Budan buryn Aqtaýda referendým kúni týǵan sábıge Ata-Zań esimi qoıylǵanyn jazǵanbyz.