Astanada jańa tartymdy oryndar qaı tustarda ashylady

ASTANA. KAZINFORM – Astana qalasynyń ákimi Jeńis Qasymbek Instagram paraqshasynda jańadan ashylatyn tartymdy oryndar týraly jazdy, dep habarlaıdy elorda ákimdiginiń resmı saıty.

– Elordamyzdy aýqymdy túrde abattandyrý jumysyn júrgizip jatyrmyz. Qalada qoǵamdyq keńistikterdi (saıabaqtar, gúlzarlar, jelekjoldar) abattandyrý jumysy bastaldy. Máselen, sońǵy jyldary Astanada shamamen 500 qoǵamdyq jáne aýla keńistigi abattandyryldy. 

Abattandyrý barysynda kógaldandyrýǵa erekshe nazar aýdarylady. «Myńjyldyq» alleıasynda jumys birden úsh mańyzdy keńistikte bastalady: Qýanyshbaev atyndaǵy teatr aldynda ornalasqan gúlzar, temirjol vokzaly mańyndaǵy park, «Nurly jol» vokzalynyń aýmaǵy. Bul – uzyndyǵy 4 shaqyrymnan asatyn iri jelilik saıabaqty qalyptastyrýdyń alǵashqy kezeńi. Ol bolashaqta qalanyń negizgi oryndaryn birtutas jaıaý júrginshiler osine biriktiredi. 

Sol sııaqty Tóle bı kóshesinen Ánet baba kóshesine deıin, Kúltegin kóshesinen Aıtmatov kóshesine deıingi Greenline jaıaý júrginshiler jelekjolyn (2-kezek) abattandyrý jumysy jalǵasyp jatyr. Munda oıyn jáne sport alańdary, toǵandar júıesi jáne basqa da nysandar qarastyrylady.

Ózgerister negizgi magıstraldardy da qamtıdy: Qaldaıaqov, Kenesary kósheleri, sondaı-aq Máńgilik El, Qabanbaı batyr, Momyshuly jáne Uly Dala dańǵyldary.

Negizgi nazar – jaıaý júrginshiler aýmaǵynda: kedergisiz orta, kógaldandyrý jáne sapaly qoǵamdyq keńistikter.

Esil ózeni boıymen úzdiksiz jaıaý júrginshiler baǵytyn qalyptastyrý jumysy jalǵasyp jatyr. Sondaı-aq «Beıbitshilik jáne kelisim» saıabaǵyn jańa Kongress-ortalyq baǵytyna qaraı (2-kezek), «Qalalyq romans» saıabaǵyn (2-kezek) abattandyrý jumysy júrgizilýde jáne t.b. Sonymen qatar Kishi Taldykól aýmaǵynda eko-saıabaqty abattandyrý jumysy bastalady.

Sondaı-aq «Tulpar» saýda úıi janyndaǵy, №119 mektep mańyndaǵy, Pýshkın kóshesindegi, Sátbaev kóshesi men Momyshuly dańǵylynyń qıylysyndaǵy gúlzarlar abattandyrylady. Sol sııaqty Momyshuly dańǵyly, Qudaıberdiuly kóshesi, Qoshqarbaev dańǵyly jáne t.b. aýmaqtar qamtylady. Bul jumys elordanyń barlyq aýdanynda júrgiziledi, – dep jazdy Jeńis Qasymbek.

Buǵan deıin Astanada eki deńgeıli jol jobasy týraly jazǵan edik.