Astanada veloınfraqurylym qalaı damyp keledi

ASTANA. KAZINFORM — Astanada «ekologııalyq» kólik minetinder sany artyp keledi. Ony tanymal etý úshin qalada tıisti ınfraqurylym belsendi túrde damýda. Búginde velojoldardyń uzyndyǵy 152 shaqyrymnan asty, dep habarlaıdy Astana ákimdiginiń resmı saıty.

Elordada ekologııalyq kólik qarqyndy damyp keledi. Qalada 1 500 birlik elektrkólik, 90 elektrquıý stantsııasy bar. 

Sondaı-aq, veloınfraqurylymdy salý boıynsha aýqymdy jumys júrgizilip jatyr. Qazirgi tańda velojoldardyń uzyndyǵy 152,75 shaqyrymdy quraıdy.

Eske salaıyq, 2018 jyly Esil aýdanynda uzyndyǵy 34 shaqyrym bolatyn «Velosıped kóligin damytý» jobasynyń birinshi kezeńi iske qosyldy. Bul ýchaske Ortalyq saıabaq pen «Jasyl beldeý» velojolyn jalǵady. «Jasyl beldeý» aýmaǵynda uzyndyǵy 23 shaqyrym bolatyn jol toraby salyndy.

2020 jyly uzyndyǵy 89 shaqyrym bolatyn velosıped kóliginiń ekinshi kezeńdik ınfraqurylym jobasy ázirlendi. 2021 jyly Músirepov, Abylaı han, Qudaıberdiuly, Qoshqarbaev kósheleri men Máńgilik El dańǵyly boıynda 7,5 shaqyrym velojol salyndy.

2024 jyly Máńgilik El dańǵylyn qaıta jóndeý jumysy aıasynda uzyndyǵy 3 shaqyrymdyq (birinshi kezeń) velojol tóseldi. Al Qabanbaı batyr dańǵyly boıynda Syǵanaq kóshesinen ıppodromǵa deıin uzyndyǵy 6 shaqyrymnan asatyn velojol salyndy.

Bıyl Syǵanaq kóshesinde (Qabanbaı batyrdan Táýelsizdikke deıin) uzyndyǵy 0,4 shaqyrym velojol, Máńgilik El dańǵylynyń ekinshi kezeńdik qaıta jóndeýinde (Uly Daladan Qabanbaı batyrǵa deıin) uzyndyǵy 1 shaqyrym velojol salyndy. Qurylys jalǵasyp jatyr, ony osy jyldyń qazan aıynda aıaqtaý josparlanyp otyr.

Aıta keteıik, Almatynyń basty kósheleriniń birinde jańa velojol salynady.