Astanada úıine 16 jyl boıy qujat almaǵan adamdar bar
Astana qalasynyń ákimi Jeńis Qasymbek Instagram paraqshasynda «Nur-besik» shaǵynaýdanynyń máselesin kóterdi, dep habarlaıdy Kazinform.
«Elordada 200-den astam úı ornalasqan „Nurbesik“ shaǵynaýdany (Kóktal 1 eldi mekeni) bar. Munda myńnan astam adam ómir súredi. Bul shaǵynaýdanda qala turǵyndary 2007 jyldan beri turyp jatqanymen 16 jyldan beri úılerine quqyq belgileıtin qujattary bolmaǵan. Sol sebepti olar óz úıine tirkele almaǵan. Osylaısha emhanaǵa tirkelýine, balalaryn balabaqshaǵa, mektepke berýine múmkindigi bolmady. Olar dostary men týystarynyń úılerine tirkelýge májbúr boldy», — deıdi ol.
Ákimniń aıtýynsha, «Nurbesik» shaǵynaýdanynyń turǵyndary jer ýchaskesin zańdastyrý máselesin birneshe ret kótergen.
Bul baǵytta aýqymdy jumys atqarylyp, tehnıkalyq máseleniń bári sheshildi.
Qazirgi ýaqytta turǵyndarǵa quqyq belgileıtin qujattardy berý rásimi júrip jatyr.
Endi olardy resmı túrde elorda turǵyny dep aıtýǵa bolady jáne 16 jyldan keıin tirkele alady.
«Shaǵynaýdandy abattandyrýmen de aınalysyp jatyrmyz: sýmen jabdyqtaý, sý burý, nóser kárizi, elektrmen jabdyqtaý, gazben jabdyqtaý sekildi ınjenerlik jelilerdiń qurylysy boıynsha jumys aıaqtaldy. Sol sııaqty kóshelerge asfalt tóseldi, jaryqtandyrý baǵanalary, 3 aıaldama, ınternet ornatyldy, t. b. Biz qalanyń eldi mekenderin damytýdy ary qaraı jalǵastyramyz», — dep jazdy Jeńis Qasymbek.
