Astanada túngi aýysymda 1 200-den asa arnaıy tehnıka qar kúreıdi
ASTANA. KAZINFORM — Elordanyń kommýnaldyq qyzmetteri qys mezgilinen bastap táýlik boıy aýysymmen jumys júrgizip keledi. Qar men muzdy tazalaý toqtaýsyz júrgizilip jatyr, dep habarlaıdy qala ákimdiginiń resmı saıty.
15 jeltoqsan kúni qaladan 23 myń tekshe metrden asa qar 1927 reıspen shyǵaryldy.
16 jeltoqsanǵa qaraǵan túni qar kúreý jumysyna 341 jol jumysshysy men 1240 birlik arnaıy tehnıka jumyldyrylǵan.
Qys mezgili bastalǵannan beri qaladan qar polıgonyna 621 myńnan astam tekshe metr qar 48 315 júk kólikterimen shyǵaryldy.
— Birinshi kezekte negizgi kósheler men qoǵamdyq kólik joldary tazalanady. Osydan keıin qozǵalysy ortasha aýmaqtar — aýlalar, alańdar, trotýarlar men aıaldamalar tazartylady. Qala turǵyndarynyń qaýipsiz qozǵalysyn qamtamasyz etý úshin joldarǵa, trotýarlar jáne kóshelerge tehnıkalyq tuz sebilip jatyr. Bul jumys ta táýlik boıy júrgiziledi, — delingen habarlamada.
Sonymen qatar, turǵyn úı aýmaqtaryndaǵy tazalyqty PIK pen MIB qyzmetkerleri qamtamasyz etedi, olar aýlalardy qar men muzdan ýaqytynda tazalaý arqyly turǵyndardyń jaılylyǵy men qaýipsizdigin qamtamasyz etýi tıis.
Astana ákimdigi qala turǵyndary men qonaqtaryna qaýipsizdik erejelerin saqtaýǵa, joldar men trotýarlarda barynsha saq bolýǵa, sondaı-aq qolaısyz aýa raıy kezinde alys jolǵa shyqpaýǵa shaqyrady.
Aıta keteıik, elordada aýa raıynyń kúrt nasharlaýy baıqalýda, aıaz býyp, boran soǵady jáne jel kúsheıedi dep boljaıdy mamandar. Bas shtattan tys travmatolog, basqarma mamany Alekseı Solod qala turǵyndaryn qaýipsizdik sharalaryn saqtaýǵa jáne kóshede saq bolýǵa shaqyrady.