Astanada sýrdo fýtzaldan úzdikter anyqtaldy
ASTANA. KAZINFORM — Astana qalasynda sýrdo fýtzaldan 21 jasqa deıingi jastar arasynda Qazaqstan chempıonaty óz máresine jetti.
Jarys qorytyndysy boıynsha jalpykomandalyq esepte І oryndy Astana qalasynyń komandasy ıelendi. Shymkent qalasy ІІ, al Soltústik Qazaqstan oblysynyń komandasy ІІІ orynǵa ıe boldy.
— El birinshiligi tartysty ótti. Jarys aınalmaly júıe boıynsha uıymdastyryldy. Chempıonat qorytyndysy boıynsha úzdik óner kórsetken sportshylar Qazaqstan komandasynyń qataryna irikteledi, — dedi dene múmkindikteri shekteýli tulǵalarǵa arnalǵan sporttyq daıarlaý ortalyǵynyń ádiskeri Arman Amrenov.
Estý qabileti zaqymdanǵan sportshylar arasynda fýtzaldan Qazaqstan chempıonaty 18-24 sáýir aralyǵynda ótti. Atalǵan dodaǵa Astana, Almaty, Shymkent qalalary men Jambyl, Qyzylorda, Qostanaı, Soltústik Qazaqstan jáne Abaı oblystarynyń sportshylary qatysty.
Aıta keteıik, bıylǵy Eýropa chempıonattarynda úsh qazaqstandyq fýtbolshy júldege qol jetkizdi.
