Astanada semserlesýden ótetin Álem kýboginde el quramasynan kimder óner kórsetedi

ASTANA. KAZINFORM - Qazaqstan tarıhynda alǵash ret semserlesýden shpaga boıynsha Álem kýbogi kezeńi ótpek. Halyqaralyq doda 26-29 naýryz kúnderi Astanadaǵy QAZAQSTAN jeńil atletıka sport kesheninde uıymdastyrylady.

QR Týrızm jáne sport mınıstrligi baspasóz qyzmetiniń habarlaýynsha, jarysqa 96 elden 600-den astam sportshy qatysady dep josparlanǵan.

Týrnır erler jáne áıelder arasynda jeke jáne komandalyq syndar boıynsha ótedi. Bul báseke Halyqaralyq semserlesý federatsııasy (FIE) kúntizbesine engen bedeldi jarystardyń biri sanalady.

Dástúrli túrde Álem kýboginiń kezeńderin Shveıtsarııa, Germanııa, BAÁ jáne Kanada qabyldap kelse, bıyl bul tizimge alǵash ret Qazaqstan qosylyp otyr.

FIE-niń týrnırdi Astanada ótkizý týraly sheshimi Qazaqstannyń Ulttyq semserlesý federatsııasynyń jumysyna jáne eldiń uıymdastyrýshylyq áleýetine berilgen joǵary baǵa deýge bolady. Sonymen qatar bul bastama Ortalyq Azııa óńirinde semserlesý sportyn damytýǵa serpin berip, Qazaqstandy álemdik deńgeıdegi jarystar ótetin jańa ortalyqtardyń birine aınaldyrýǵa múmkindik ashady. Aıta keteıik, Qazaqstan – óńirde osy sport túrinen Álem kýbogin ótkizý quqyǵyna ıe bolǵan alǵashqy memleket.

Atalǵan dodada ulttyq qurama sapynda Rýslan Qurbanov, Elmır Álimjanov, Erlik Sertaı, Kırıll Prohodov jáne Vadım Sharlaımov óner kórsetedi. Jalpy, ár dıstsıplına boıynsha erler men áıelderdi qosa eseptegende, 30-ǵa deıin otandyq sportshy júlde jolynda baq synaıdy.

Osyǵan deıin Qazaqstan tarıhynda tuńǵysh ret semserlesýden Álem kýbogynyń kezeńi elimizde ótetini týraly jazdyq.