Astanada samokatshyny kólik qaǵyp ketti

ASTANA. KAZINFORM – Baǵdarshamnyń jasyl túsinen ótip bara jatqan samokat mingen jas jigitti avtokólik qaǵyp ketti. 

— «Hyundai» markaly avtokólik júrgizýshisi Halıfa ben Zaıd Ál-Nahaıan kóshesimen kele jatyp, E308 kóshesimen qıylysynda ońǵa burylǵan kezde, qozǵalys baǵyty boıynsha ońnan solǵa qaraı belgilengen jerden joldy kesip ótken elektrosamokat júrgizýshisin qaǵyp ketken, — dep habarlaıdy qalalyq polıtsııa. 

Oqys oqıǵanyń beınejazbasy jelide tarady. 

— Zardap shekken azamat medıtsınalyq mekemege jetkizildi. Dárigerlerdiń tekserisinen keıin ol úıine jiberildi, — delingen aqparatta. 

Qazir polıtseıler jol apatynyń mán-jaıyn anyqtap jatyr. 

Aıta keteıik, elimizde elektr samokattardyń jyldamdyǵyna qatysty tártip qaıta qaralýy múmkin. 

Sondaı-aq Astanadaǵy alǵashqy mamandandyrylǵan samokat turaǵy týraly jazǵan edik.