Astanada samokat paıdalanýshylar arasyndaǵy quqyqbuzýshylyq artqan
ASTANA. KAZINFORM – Astana qalasy Kommýnıkatsııalar qyzmetiniń alańynda ótken brıfıngide Astana qalasy Polıtsııa departamenti Ákimshilik polıtsııa basqarmasy bastyǵynyń orynbasary Mahambet Tóleshov baıandama jasady.
Onyń aıtýynsha, ótken jyldyń jazǵy maýsymyndaǵy apattylyq jaǵdaıyna júrgizilgen taldaý elektrosamokattardyń qatysýymen bolatyn quqyqbuzýshylyqtar men jol-kólik oqıǵalarynyń artqanyn kórsetken. Máselen, 2025 jyly elektrosamokattardyń qatysýymen 45 jol-kólik oqıǵasy tirkelip, nátıjesinde 50-den astam adam jaraqat alǵan.
– Quqyq qoldaný tájirıbesin taldaý elektrosamokat paıdalanýshylary tarapynan jasalatyn zańbuzýshylyqtardyń júıeli sıpatqa ıe ekenin kórsetedi. Eń jıi kezdesetinderi – bir samokatta eki adamnyń birge júrýi, jaıaý júrginshiler ótkelinen túspeı ótý, sondaı-aq kámeletke tolmaǵandardyń elektrosamokat paıdalanýy, – dedi vedomstvo ókili.
Qoldanystaǵy zańnamaǵa sáıkes, samokat júrgizýshilerine jol qozǵalysy erejeleriniń barlyq talaby men ákimshilik jaýapkershilik sharalary tolyq kólemde qoldanylady.
– Róldi keminde bir qolmen ustamaı júrýge, arnaıy jabdyqty qospaǵanda jolaýshy men júk tasýǵa, sondaı-aq tramvaı joly bar nemese kóp jolaqty joldarda solǵa burylýǵa jáne keri burylýǵa tyıym salynady, – dedi ol.
Sonymen qatar spıker elektrosamokattardy paıdalaný kezinde qaýipsizdik talaptary da belgilengen ekenin eske saldy. Atap aıtqanda, qorǵanysh shlemin paıdalaný, al qarańǵy ýaqytta jaryq shaǵylystyratyn elementterdi taǵý mindetti. Qozǵalys velosıped joldarymen nemese velosıped jolaǵymen júzege asyrylýy tıis. Olar bolmaǵan jaǵdaıda, joldyń oń jaq shetimen, onyń ishinde qoǵamdyq kólikke arnalǵan jolaqpen bir qatarda júrýge ruqsat etiledi. Bul rette mundaı ýchaskelerde elektrosamokatty tek 18 jasqa tolǵan jáne kez kelgen sanattaǵy júrgizýshi kýáligi bar tulǵalar ǵana basqara alady.
– Atalǵan talaptardy saqtamaǵany úshin Ákimshilik quqyq buzýshylyq týraly kodekstiń 593, 620, 615 jáne 127-baptaryna sáıkes ákimshilik jaýapkershilik qarastyrylǵan, – dep tolyqtyrdy spıker.
Buǵan deıin elde jalǵa beriletin samokattarǵa qandaı nómir beriletini anyqtalǵanyn jazǵanbyz.