Astanada respýblıkalyq jastar forýmy ótti
ASTANA. KAZINFORM — Astanada «QazMed Volunteers — medıtsınalyq volonterlik el ıgiligi úshin» respýblıkalyq forýmy ótti. Bul týraly QR Mádenıet jáne aqparat mınıstrligi habarlady.
Jıynǵa jastar uıymdarynyń ókilderi, medıtsınalyq volonterler jáne elimizdiń barlyq aımaqtarynan kelgen sarapshylar qatysty. Іs-shara QR Mádenıet jáne aqparat mınıstrliginiń qoldaýymen jáne «Medıtsınalyq jastar» respýblıkalyq qoǵamdyq birlestiginiń bastamasymen uıymdastyryldy.
Forým aıasynda alǵashqy medıtsınalyq kómek kórsetý boıynsha sheberlik sabaqtary, qan donorlyǵyn nasıhattaý aktsııalary, jastarǵa arnalǵan dárister, pikirtalas alańdary, sondaı-aq volonterlik jobalardyń kórmesi ótti.
Óńirlik úılestirýshiler qatysqan plenarlyq otyrysta volonterlik salasyndaǵy ózekti máseleler talqylandy. Qatysýshylarǵa «Men — medık-volonter», «Project manager degen kim?», «Medıtsınadaǵy medıa» taqyryptarynda sheberlik sabaqtary uıymdastyryldy.
— Medıtsınalyq volonterlikti júıeli damytý úshin QazMed Digital onlaın-platformasy iske qosyldy. Onda 10 oqý modýli qoljetimdi, 2 500-den astam volonter tirkelgen, shamamen 1 200 jas qatysýshy onlaın-oqytýdan ótip, sertıfıkat aldy. Sonymen qatar 10 podkast ázirlenip, áleýmettik jelilerde 50-den astam beınerolık jáne 150-den astam aqparattyq materıal jarııalandy. Sonymen qatar Astana, Almaty, Shymkent, Semeı jáne Qaraǵandy qalalarynda óńirlik front-keńseler ashyldy. Biryńǵaı korporatıvtik stıl men arnaıy volonterlik kıim ázirlendi, — delingen aqparatta.
Bastamalardy qoldaý úshin jalpy somasy 10 mıllıon teńge bolatyn shaǵyn granttar baıqaýy ótkizildi. Kelip túsken 49 ótinimniń ishinen 10 jeńimpaz anyqtaldy. Jobalar áleýmettik osal toptarǵa kómek kórsetý, salaýatty ómir saltyn nasıhattaý, donorlyqty damytý, alǵashqy jáne psıhologııalyq kómek kórsetý baǵyttary boıynsha iske asty. Nátıjesinde 2 000-nan astam adam qamtylyp, 10 000-nan astam adam aqparat aldy.
Budan bólek, 2025 jyldyń 29 qyrkúıegi men 12 qazany aralyǵynda respýblıkalyq deńgeıde QazMedFest aptalyǵy ótti. Aptalyq aıasynda volonterlikti nasıhattaý boıynsha túrli kreatıvti is-sharalar uıymdastyryldy. Joba qorytyndysy boıynsha óńirlik keńselerdiń jumys nátıjesi men shaǵyn granttar aıasynda júzege asyrylǵan úzdik bastamalar engen «Medıtsınalyq volonterliktiń úzdik tájirıbeleri» atty jınaq jaryq kórdi.
Aıta keteıik, buǵan deıin «Jyl volonteri — 2025» halyqaralyq syılyǵynyń jeńimpazdary anyqtaldy.