Astanada respýblıkalyq olımpıada jeńimpazdary marapattaldy
ASTANA. KAZINFORM — Oqý-aǵartý mınıstri Juldyz Súleımenova respýblıkalyq olımpıada jeńimpazdaryn marapattady, dep habarlaıdy mınıstrliktiń baspasóz qyzmeti.
Elordada 9–11 (12) synyp oqýshylary arasynda fızıka jáne bıologııa pánderi boıynsha respýblıkalyq olımpıada qorytyndylandy. Tanym kópbeıindi kesheninde ótken jeńimpazdardy marapattaý rásimine QR Oqý-aǵartý mınıstri Juldyz Súleımenova qatysty. Sala mınıstri olımpıadanyń birinshi oryn ıgerelerine altyn medal tabystady. Respýblıkalyq olımpıadanyń Astanada ótken qorytyndy kezeńine elimizdiń barlyq óńirlerinen 300-den astam oqýshy qatysty.
Jıynda sóılegen Juldyz Súleımenova fızıka jáne bıologııa pánderiniń mańyzyna toqtaldy.
— Bıylǵy olımpıada eki birdeı mańyzdy datamen tuspa-tus keldi. Onyń biri elimizde jańa Konstıtýtsııa kúshine enip, el damýynyń jańa kezeńine aıaq bastyq. Ekinshiden, bıylǵy olımpıada Naýryz meıramymen qatar keldi. Osylaısha, respýblıkalyq olımpıada jastar úshin jańa múmkindikter alańyna aınaldy. Memleket basshysy Qasym-Jomart Toqaev progressıvti, bilimdi jastarǵa úlken senim artady. Memleket tarapynan jastardy qoldaý úshin barlyq jaǵdaı jasalyp jatyr. Halyqaralyq júldegerlerge jáne olardyń ustazdaryna Memleket basshysy Kasym-Jomart Toqaevtyń tikeleı tapsyrmasymen qarjylaı birjolǵy syıyqy qarastyrylǵan, — dedi.
Respýblıkalyq olımpıadanyń maqsaty — daryndy oqýshylardy anyqtaý, olarǵa qoldaý kórsetý, oqýshylardyń ıntellektýaldyq jáne ǵylymı áleýetin damytý, sondaı-aq halyqaralyq zııatkerlik jarystarǵa qatysatyn qazaqstandyq quramany jasaqtaý.
Bıyl jalpy bilim beretin pánder boıynsha respýblıkalyq olımpıadanyń qorytyndy kezeńine elimizdiń barlyq óńirlerinen 360 myńnan astam oqýshy qatysty. Olardyń arasynan 1636 oqýshy respýblıkalyq kezeńge joldama alyp, óz bilimderin túrli baǵytta dáleldeýge múmkindik aldy. Jaratylystaný-matematıka baǵytynda 930, al qoǵamdyq-gýmanıtarlyq baǵytta 706 oqýshy baq synady. Aýyl mektepteriniń respýblıkalyq olımpıadasynda 73 jeńimpaz anyqtaldy.
Saıysqa qatysýshylardyń jartysyna jýyǵy (45%) Qazaqstan Respýblıkasy Oqý-aǵartý mınıstrliginiń I, II jáne III dárejeli dıplomdarymen, sondaı-aq altyn, kúmis jáne qola medaldarmen marapattalady.
Osyǵan deıin pavlodarlyq oqýshy respýblıkalyq olımpıadada top jarǵanyn jazdyq.