Mýzykalyq bilim berý salasynda eńbek etip júrgen birqatar azamatqa nagradalar tabystaldy
ASTANA. KAZINFORM – Astanada Premer-mınıstrdiń orynbasary – Mádenıet jáne aqparat mınıstri Aıda Balaeva Memleket basshysy Qasym-Jomart Toqaevtyń atynan mýzykalyq bilim berý salasynda eńbek etip júrgen birqatar azamatqa memlekettik nagradalar tabystady.
Marapattaý rásiminde Aıda Balaeva árbir mamannyń adal eńbegi el damýyna qosylǵan mańyzdy úles ekenin atap ótti.
— Memleket basshysy árdaıym eńbek adamyna erekshe kóńil bóledi. Búgingi jetistikterińiz ben tabystaryńyz — sonyń aıqyn dáleli. Prezıdent eńbek adamdaryn yntalandyrý jáne marapattaý bastamasyn únemi qoldaıdy. Óıtkeni adal eńbek árqashan laıyqty baǵalanýǵa tıis. Sizder elimizdiń damýyna úlken úles qosyp kelesizder. Keıde onyń qanshalyqty mańyzdy ekenin ózderińiz de baıqamaı, kún saıyn adal ári jaýapty eńbek etip júrsizder. Bul jumysty shyn nıetpen, bar yqylastaryńyzben atqaryp kele jatqandaryńyzdy jaqsy bilemin. Eńbekterińiz árdaıym laıyqty baǵalanyp, syı-qurmetke bólene berińizder, — dedi Premer-mınıstrdiń orynbasary.
Elimizdiń áleýmettik-mádenı damýyna, sondaı-aq ulttyq qundylyqtardy dáripteýge jáne kúı ónerin keńinen nasıhattaýǵa baǵyttalǵan respýblıkalyq «Kúı kúmbiri» aktsııasyn ótkizýge qosqan eleýli úlesi úshin Qazaqstan Respýblıkasy Prezıdentiniń Jarlyǵymen:
— «Qurmet» ordenimen — qoıýshy rejısser Qarlyǵash Ajıeva;
— «Eren eńbegi úshin» medalimen — E. Rahmadıev atyndaǵy Memlekettik akademııalyq fılarmonııanyń «Qorqyt» dástúrli mýzykalyq tobynyń kórkemdik jetekshisi Sholpan Qorǵanbek marapattaldy.
Prezıdenttiń «Alǵys» gramotasymen:
— № 1 balalar mýzyka mektebi dırektorynyń tárbıe isi jónindegi orynbasary, dástúrli óner pánderiniń pedagogi Janar Oralbaeva;
— R. Baǵlanova atyndaǵy № 2 balalar mýzyka mektebi dırektorynyń mindetin atqarýshy Gúlnur Qamzına;
— № 3 balalar mýzyka mektebi dırektorynyń tárbıe isi jónindegi orynbasary Aınur Baımahanova;
— Astana qalasy ákimdigine qarasty № 2 kórkemsýret mektebi dırektorynyń tárbıe isi jónindegi orynbasary Gúlshat Jumabaeva marapattaldy.
Aıta ketelik Memleket basshysy «Taza Qazaqstan» aktsııasyna belsene qatysqan azamattardy marapattaǵan edi.
