Astanada para dzıýdodan álem chempıonaty bastalady

ASTANA. KAZINFORM — 13 mamyrda Astana qalasynda para dzıýdodan álem chempıonaty bastalady.

Elordadaǵy Jaqsylyq Úshkempirov atyndaǵy jekpe-jek saraıynda ótetin IBSA Judo World Championships Astana 2025 para dzıýdodan álem chempıonaty tórt jylda bir márte uıymdastyrylady. Ol — para dzıýdo álemindegi eń bedeldi doda.

Jarystyń ótýine Halyqaralyq zaǵıptar sport federatsııasy (IBSA) qoldaý bildirdi. Onda 2028 jyly AQSh-tyń Los-Andjeles qalasynda ótetin Paralımpıadaǵa mańyzdy reıtıngtik upaılar sarapqa salynady. Álem chempıonatyna jer-jahannyń 40 elinen kelgen 350-den astam úzdik sportshy qatysady dep josparlanyp otyr. Olardyń qatarynda 15 Paralımpıada chempıony men júldegeri bar.

Bedeldi básekede el namysyn Aqmaral Naýatbek, Erǵalı Shámeı, Daıana Fedosova, Jurqamyrza Shúkirbekov syndy ulttyq qurama kóshbasshylary qorǵaıdy. Sondaı-aq elorda tatamıinde Alana Martıns Maldonado (Brazılııa), ıÝjıto Shıro (Japonııa), Florın Bologa (Rýmynııa), Sherzod Namozov (Ózbekstan), Ibrahım Bólúkbashy (Túrkııa) jáne basqa da ataqty sportshylar beldesedi.

Jahandyq dodada 10 salmaqta júlde jıyntyǵy sarapqa salynady. Erler 70, 81, 95, 95 keliden joǵary salmaqta beldesse, áıelder 52, 60, 70, 70 keliden joǵary salmaqta júldege talasady.

Sondaı-aq, Halyqaralyq dzıýdo federatsııasy tájirıbe retinde Olımpıada salmaǵyna kirmeıtin 2 salmaqta (erlerde 64, áıelderde 46 keli) júlde sarapqa salynady.

Dúbirli dodada saǵat 10:00–13:00 aralyǵynda irikteý beldesýi bolsa, 15:30–17:00 shamasynda fınal belgilengen.

Keıingi úsh jylda Astanada dzıýdodan Grand Prix serııasynyń kezeńderi men 2023 jylǵy Azııa chempıonaty uıymdastyryldy. Osyndaı mańyzdy jarystardy ótkizý arqyly elimiz para dzıýdodan álem chempıonatyn qabyldaýǵa laıyqty ekenin kórsetti.