Astanada Ortalyq Azııa óńirlik ortalyǵy qurylady
ASTANA. KAZINFORM – Býharestte (Rýmynııa) Eýropa men Azııa elderiniń ókilderi, Eýropalyq Odaq jáne ASEAN Hatshylyǵy qatysqan Azıattyq-Eýropalyq kezdesý (ASEM) bilim berý salasynyń basym ókilderi deńgeıindegi alǵashqy keńesi (ASEM SOM1) ótti. Bul týraly Ǵylym jáne joǵary bilim mınıstrligi habarlady.
Іs-sharaǵa QR Ǵylym jáne joǵary bilim mınıstrligi atynan Ulttyq joǵary bilim berý ortalyǵy dırektorynyń mindetin atqarýshy Álibek Mádibekov qatysty. Ol Qazaqstannyń úzdiksiz bilim berýdi damytý, mıkrobiliktilikterdi engizý, tsıfrlyq transformatsııa jáne bilim berý baǵdarlamalaryn jańǵyrtý jónindegi ulttyq tájirıbesi, sondaı-aq halyqaralyq yntymaqtastyqty keńeıtý baǵytyndaǵy elimizdiń jumysy týraly baıandama jasady.
ASEM – Eýropa men Azııa elderi arasyndaǵy yntymaqtastyqtyń eń iri óńiraralyq platformasy. Onyń bilim berý baǵyty akademııalyq utqyrlyqty damytýǵa, biliktilikterdi tanýǵa jáne ulttyq bilim berý júıelerin jetildirýge baǵyttalǵan. Bul arhıtektýrada ASEM Lifelong Learning Hub (ASEM LLL Hub) erekshe oryn alady – 2004 jyly qurylǵan ýnıversıtetter, zertteý ortalyqtary jáne memlekettik qurylymdardyń resmı jelisi.
Hab eki óńirdiń sarapshylary men uıymdaryn biriktirip, dáleldi bilim berý saıasatyn damytýǵa, zertteýler júrgizýge jáne úzdiksiz bilim berý salasyndaǵy ozyq tájirıbelerdi taratýǵa yqpal etedi.
Keńes barysynda ASEM LLL Hub tóraǵalyǵyn Irlandııadan Taıland Koroldigine resmı túrde berý rásimi ótti. Taıland hatshylyqty Bangkok qalasyndaǵy Chýlalongkorn ýnıversıtetinde ornalastyratyn bolady. Bul sheshim Hab damýynyń jańa kezeńin bastap, onyń Azııa óńirindegi qyzmetiniń keńeıýin bildirdi.
Sonymen qatar ASEM LLL Hub jelisiniń qurylymdyq keńeıýi jarııalandy. Onyń aıasynda Astanadaǵy L.N.Gýmılev atyndaǵy Eýrazııa ulttyq ýnıversıteti bazasynda Ortalyq Azııa óńirlik ortalyǵy qurylmaq. Jańa ortalyq zertteý jobalaryn úılestirý, mıkrobiliktilikterdi damytý, Ortalyq Azııa ýnıversıtetteriniń Eýropa jáne Azııa áriptesterimen yntymaqtastyǵyn nyǵaıtý, sondaı-aq óńirde úzdiksiz bilim berý saıasatyn ilgeriletý platformasyna aınalady.
Ortalyqtyń qurylýy Qazaqstannyń halyqaralyq bilim berý bastamalaryndaǵy mańyzdy rólin aıqyndaı túsip, eldiń óńirlik kóshbasshy retindegi pozıtsııasyn kúsheıtedi.
Qazaqstannyń SOM1 jumysyna qatysýy jáne ASEM LLL Hub-tyń Ortalyq Azııa óńirlik ortalyǵyn qurýy elimizge zertteý áleýetin arttyrý, bolashaq daǵdylaryn damytý, halyqaralyq áriptestik aıasyn keńeıtý jáne jahandyq bilim berý kún tártibin qalyptastyrýǵa qosatyn úlesin nyǵaıtý baǵytynda qosymsha múmkindikter ashady.
Aıta keteıik, Ózbekstan Ortalyq Azııa elderi qoǵamdastyǵyn qurýdy usyndy.