Astanada Mustafa Óztúriktiń 60 jyldyǵy toılanady
ASTANA. QazAqparat - 11 sáýir kúni Astana qalasyndaǵy Nazarbaev ortalyǵynda álemge áıgili sport sheberi, Qazaqstanda taekvondo mektebiniń negizin qalaýshy Mustafa Óztúriktiń 60 jyldyǵy qarsańynda «Qazaqstan-Túrkııa dostyq keshi» atty kontsert bolady.
Baǵdarlamada Túrkııa qazaqtarynyń kúıleri shertilip, ánderi shyrqalady.
Óner keshi Astana qalasy memlekettik fılarmonııasynyń Qazaq halyq aspaptary orkestriniń súıemeldeýimen ótedi. Orkestrdiń kórkemdik jetekshisi jáne bas dırıjeri - QR eńbek sińirgen qaıratkeri, professor Aıtqalı Jaıymov.
Dırıjer, Mádenıet qaıratkeri, sazger Nurlan Bekenovtiń aıtýynsha, bul kúni Qazaq eli men Túrkııanyń dostyǵyn pash etetin, sheteldegi qazaqtardyń ónerin atajurtynda kórsetetin tamasha kontsert bolady. Kontsertte Qazaqstanda oryndalmaǵan jańa týyndylar astanalyqtardyń nazaryna usynylmaq. Sonyń ishinde Mirjaqyp Dýlatovtyń kúıi «Áýez», Mustafa Óztúriktiń sózine jazylǵan Ǵanı Makınniń «Juldyzdardy tileısiń be?» atty áni jáne taǵy basqa kúıler bar.
Osy sharaǵa qonaq retinde Astana qalasyndaǵy Júnis Ámire Túrik mádenı ortalyǵynyń tóraǵasy Ibrahım Iyldyrym, Túrkııadaǵy qazaq qoǵamynyń jetekshisi Fazyl Toply qatysady. Mırmar-Sınan kórkemóner ýnıversıtetiniń professory, tarıh ǵylymdarynyń doktory Ábdiýaqap Qara kirispe sóz sóılep, Túrkııadaǵy baýyrlardyń sálemin jetkizedi.
Osy kontsertte Túrkııadaǵy qazaq qoǵamynyń mádenıet bóliminiń meńgerýshisi Beshir Ahmet Kóse, sondaı-aq óner ıeleri Sedat Solaquly, Erjan Tunjer sahnaǵa shyǵady.
Sonymen qatar otandastarymyz QR eńbek sińirgen qaıratkeri, professor, dombyrashy Orynbaı Dúısen, QR eńbek sińirgen qaıratkeri, professor Raýshan Musaqojaeva, QR eńbek sińirgen qaıratkeri, ánshi Gúlzıra Bókeıhan kórermenderge án men kúıden shashý shashady.
Sheteldegi baýyrlardyń sálemin jetkizgen kontsertte tanymal ánshiler Nuraı Tanabaev, Zaǵıpa Imanǵazy, Kúnsulý Turlybekova, Samat Jeksenbaev jáne t.b.óner sheberleri qatysady dep josparlanǵan.
