Astanada mobıldi ınternet álsiz ustaıtyn oryndar jyl sońyna deıin joıylady

ASTANA. KAZINFORM – Tsıfrlyq damý mınıstrliginiń Telekommýnıkatsııa komıteti tóraǵasy Damır Seısembekov Astanada mobıldi ınternet álsiz ustaıtyn oryndardyń sanyn jáne ondaı oryndardy qalypqa keltirý jumystary jaıly aıtty.

— Astana qalasy boıynsha aıtar bolsaq, ótken jyly biz osyndaı 32 núkteni anyqtadyq. Bul elordadaǵy mobıldik ınternet álsiz ustaıtyn ne múlde ustamaıtyn jerler. Qazirgi tańda mundaı 10 «aq núkte» joıyldy, onda antennalar qoıyldy. Osy baǵyttaǵy jumystar jalǵasyp jatyr, - dedi komıtet basshysy Úkimet otyrysynda Kazinform tilshisiniń saýalyna jaýap bere otyryp.

Onyń aıtýynsha, Tsıfrlandyrý mınıstrligi 5G tehnologııasyn engizý jumystaryn júrgizip jatyr.

— Ekinshi bastama adamdar keshke úıine oralǵan kezde mobıldi ınternet álsireıtin, al basqa ýaqytta qalypty ustap turatyn aýmaqtarǵa qatysty. Qazirgi tańda Astanada 250-den astam bazalyq stansalar ornatyldy. Bul da trafıktik júktemeni azaıtýǵa kómektesedi. Memleket basshysy bizge jyl sońyna deıin 5G tehnologııasyn engizý jumystaryn aıaqtaýdy tapsyrǵan bolatyn. Biz sol mejeden shyǵý úshin barymyzdy salyp jatyrmyz, - dedi Damır Seısembekov.

Odan bólek, mınıstrlik elorda turǵyndary sanynyń únemi ósip otyratynyna baılanysty «aq núktelerdi» anyqtaý jumysyn únemi júrgizip turatynyn aıtty.

— Astananyń aýmaǵy ǵana emes, ondaǵy turǵyndar sany da ósip keledi. Soǵan saı, ınternet tutynýshylary da artady. Buryn bir úıde 1-2 smartfon ǵana bolsa, qazir ol 5 qurylǵydan da asyp túsýi múmkin. Televızor, noýtbýk, telefondar degendeı. Sol sebepti biz «aq núktelerdi» anyqtaý jáne baqylaý jumystaryn toqtaýsyz júrgizip otyratyn bolamyz. Bıyl úlken qalalarda osyndaı jumystar júrgiziledi, odan soń trassalar men basqa da nysandardy qolǵa alamyz, - dedi spıker.

Seısembekov jyl sońyna deıin buǵan deıin anyqtalǵan «aq núkteler» tolyǵymen joıylatynyn aıtady.

— Ótken jyly mobıldik ınternet ustamaıtyn ne álsiz ustaıtyny anyqtalǵan oryndar jyl sońyna deıin tolyǵymen qalypqa keltiriledi. Biz jańa bazalyq stansalar ornatamyz. Keı jaǵdaılarda turǵyn úı ıeleri shatyryna osyndaı stansalar ornatýǵa jol bermeıdi. Ondaı jaǵdaıda aýlaǵa antenna-dińgek ornatamyz. Bul jumysty ákimdikpen birlese atqaramyz jáne jyl sońyna deıin 32 «aq núkte» joıylady, - dedi Damır Seısembekov.

Osyǵan deıin Úkimet basshysy tsıfrlandyrý mınıstrligine shalǵaı eldi mekenderdi ınternetpen qamtamasyz etý jobalaryn ýaqtyly iske asyrýdy tapsyrǵan bolatyn.