Astanada «Lomonosov oqýlary» bastaldy
ASTANA. 13 sáýir. QazAqparat - Búgin Astanada «Lomonosov - 2012» VIII halyqaralyq ǵylymı konferentsııasy bastaldy.
13-14 sáýir aralyǵynda ótetin stýdentter, magıstranttar jáne jas ǵalymdar konferentsııasyn Máskeý memlekettik ýnıversıtetiniń Qazaqstandaǵy fılıaly uıymdastyryp otyr.
«Konferentsııaǵa Qazaqstannyń barlyq aımaqtarynan kelgen baıandamashylarmen qatar, Reseı, Frantsııa, Malaızııa, Tájikstan, Ózbekstan syndy 5 memlekettiń 600-ge tarta jas ǵalymy men stýdentteri qatysýda», - deıdi Máskeý memlekettik ýnıversıtetiniń Qazaqstandaǵy fılıalynyń dırektory Aleksandr Sıdorovıch.
Bıylǵy konferentsııa belgili túrkitanýshy, Eýrazııa ıdeıasynyń negizin qalaýshy Lev Gýmılevtiń 100 jyldyǵyna oraı uıymdastyrylyp otyr.
Ǵylymı konferentsııanyń negizgi maqsaty - stýdentter, magıstranttar jáne jas ǵalymdardyń shyǵarmashylyq belsendiligin arttyrý, jańa zaman ǵylymynyń ózekti máselelerin sheshý joldaryn izdestirý isine jas ǵalymdardy jumyldyrý, Qazaqstan men Reseı stýdentteri arasyndaǵy ǵylymı baılanysty nyǵaıtý.
Ár jyl saıyn «Lomonosov oqýlarynyń» qorytyndysynda tezısterdiń 2 ne 3 tomy jaryqqa shyǵyp otyrady. Atalmysh tezısterdiń tájirıbelik jáne ǵylymı qundylyǵy aıryqsha.
Shara sheńberinde matematıka, ınformatıka, ekonomıka, fılologııa, ekologııa jáne áleýmettik-gýmanıtarlyq ǵylymdar salasyndaǵy keleli máselelerdi arqaý etetin taqyryptardy taldaý qarastyrylǵan.
Baǵdarlamaǵa sáıkes, 6 sala boıynsha 593 baıandama tyńdaý josparlanyp otyr.
