Qazaqstanda Irannyń Golrang Industrial Group kompanııasy maı óńdeý zaýyty men qus fabrıkasyn salady
ASTANA. KAZINFORM - Elimiz agroónerkásiptik keshende ınvestıtsııalyq yntymaqtastyqty belsendi túrde damytyp keledi. Sheteldik ınvestorlardy tartý jumystary aıasynda ırandyq Golrang Industrial Group kompanııasymen maı ekstraktsııalaý zaýytyn jáne etti baǵyttaǵy qus fabrıkasyn salý týraly eki iri jobany júzege asyrý úshin kelisimge qol jetkizildi.
Kelisimge Aýyl sharýashylyǵy vıtse-mınıstri Ermek Kenjehanuly men kompanııa basshysy Fazlı Mehdı Mohammadkarım arasyndaǵy kezdesý barysynda qol qoıyldy. Jalpy ınvestıtsııa kólemi 120 mln AQSh dollaryn quraıdy, dep habarlaıdy QR aýyl sharýashylyǵy mınıstrliginiń baspasóz qyzmeti.
Golrang Industrial Group basshylyǵy Qazaqstanda bıznesti damytýǵa strategııalyq mańyz berip otyr.
Qazirgi ýaqytta kompanııa ókilderi bolashaq óndirister úshin óńirlerdi zerdeleýge kóńil bólip otyr.
Alǵashqy jobada táýligine 3 myń tonnaǵa deıin kúnbaǵys óńdeıtin zamanaýı maı ekstraktsııalaý zaýyty salynady dep kútilip otyr. Oǵan 70 mln dollar kóleminde tikeleı ınvestıtsııa tartý josparlanǵan. Joba aýyl sharýashylyǵy shıkizatyn tereń óńdeýdi arttyryp, ónimniń qosylǵan qunyn edáýir ósirýge múmkindik beredi.
Ekinshi baǵyt quny 50 mln dollar bolatyn zamanaýı jumyrtqa baǵytyndaǵy qus fabrıkasynyń qurylysy. Joba óndiris kólemin ulǵaıtýǵa jáne ónim sapasyn arttyrýǵa baǵyttalǵan.
Birlesken jobalardy júzege asyrý ekijaqty yntymaqtastyqtyń turaqty ósimi aıasynda júrgizilmek. 2025 jyldyń qorytyndysy boıynsha osy salada Qazaqstan men Iran arasyndaǵy taýar aınalymy 55,8%-ǵa ósip, 341 mln AQSh dollarynan asty. Bul rette, negizgi bóligin bıdaı men arpa sekildi dándi daqyldar quraıtyn qazaqstandyq eksport kólemi eki esege jýyq artty.
Kezdesý ıeleri birlesken óndiris oryndaryn salý elder arasyndaǵy ekonomıkalyq baılanystardy nyǵaıtýdyń mańyzdy qadamy ekenin atap ótti. Sonymen qatar bul bastama óńdeý ónerkásibin damytýǵa jáne Qazaqstannyń agrarlyq sektoryna jańa tehnologııalardy tartýǵa yqpal etedi.
Osyǵan deıin Qazaqstanda sıyr etine ımporttyq kvota bólinetini týraly jazdyq.
