Astanada kún saıyn jarty mıllıonnan astam kólik júredi
ASTANA. QazAqparat – Keıingi 5 jylda elorda aýmaǵynda 1 023 kólik órti tirkeldi. Bul týraly Astana qalasynyń kommýnıkatsııalar qyzmetinde ótken brıfıngide Tótenshe jaǵdaılar departamenti memlekettik órt baqylaý basqarmasynyń bastyǵy Erkin Otarǵalymuly aıtty, dep habarlaıdy QazAqparat tilshisi.
«Búgingi tańda Astanada 430 myń avtokólik bar, kún saıyn qalaǵa qosymsha 90 myń kólik keledi. Osyǵan baılanysty kólik órti boıynsha jaǵdaı kúrdeli kúıinde qalyp otyr. Uzaq ýaqyt boıy mehanızmderi men elektr jabdyqtarynyń aqaýlary bar avtokólik quraldaryn paıdalaný, sondaı-aq ártúrli qosymsha elektr jabdyqtaryn ruqsatsyz paıdalaný qyzyp ketýge, elektr jabdyqtarynyń qysqa tuıyqtalýyna ákeledi de, saldarynan órt shyǵýy yqtımal», - dep málim etti Erkin Otarǵalymuly.
Tótenshe jaǵdaılar departamenti júrgizgen taldaýǵa sáıkes, 10 jáne odan da kóp jyl qoldanysta bolǵan kólikter jıi órtenedi.
«2018 jyldan bastap qala aýmaǵynda 1023 kólik órti tirkeldi. Atalǵan kezeńde qoǵamdyq kóliktegi 36 órt tirkeldi. Tótenshe jaǵdaılarǵa jol bermeý maqsatynda avtopark basshylary men jaýapty laýazymdy tulǵalar qaladaǵy qoǵamdyq kólikterdiń tehnıkalyq jaı-kúıine baqylaýdy kúsheıtýi qajet», - dep túıindedi Erkin Otarǵalymuly.
