Astanada qoqys jaǵatyn zaýyt salynady

ASTANA. KAZINFORM – Astanada «Taza Qazaqstan» jalpyulttyq aktsııasyn júzege asyrý jalǵasyp jatyr. Jyl boıy 328 zańsyz qoqys úıindileri joıylyp, 120 myń tonnadan astam qaldyqtar shyǵaryldy. Bul týraly elorda ákimi Jeńis Qasymbek eseptik kezdesýinde aıtty.  

Ákimniń aıtýynsha, qalada qaldyqtardy shyǵarýdyń tsıfrlyq monıtorıng júıesi engizildi. Bul qyzmet kórsetýdi baqylaýdy qamtamasyz etti jáne turǵyndardyń shaǵymdaryn 99 paıyzǵa azaıtty.

– Kelesi jyldyń ekinshi toqsanynda sheteldik ınvestorlarmen birlesip, táýligine 2 250 tonnaǵa deıin qoqys jaǵatyn zaýyt salýǵa kirisemiz jáne bul zaýyt elektr energııasyn da óndiretin bolady. Zaýyt 2028 jyly iske qosylady, - dedi J. Qasymbek Ortalyq kommýnıkatsııalar qyzmetinde. 

Sonymen birge, J. Qasymbek keshendi jumystyń arqasynda úsh jylda atmosferaǵa shyǵatyn zııandy zattar 32 paıyzǵa azaıǵanyn aıtyp otyr. Bul – kásiporyndar men turǵyn alaptardy gazdandyrý, ekologııalyq transportqa kóshý jáne kógaldandyrýdyń nátıjesi.

Aıta keteıik, qarasha aıynda elordadaǵy halyq sany 1,6 mıllıon adamnan asqan. Buǵan deıin Jeńis Qasymbek qalanyń ınfraqurylymy qalaı jetildiriletinin aıtqan edi.