Astanada qazaq-mońǵol bıznes-forýmy ótedi
«2019 jyldyń 10-12 qazanynda Mońǵolııa Premer-mınıstri Ýhnaagıın Hýrelsýh Qazaqstanǵa resmı saparmen keledi. Sapar barysynda onyń Qazaqstan Respýblıkasynyń Premer-mınıstri Asqar Mamınmen kelissózderi josparlanǵan. Kelissózder barysynda saýda-ekonomıkalyq, mádenı-gýmanıtarlyq yntymaqtastyq, sondaı-aq, óńirlik jáne halyqaralyq uıymdar aıasyndaǵy ózara is-qımyl máseleleri talqylanady», - dedi elordada ótken brıfıngte QR SІM resmı ókili Aıbek Smadııarov.
Onyń aıtýynsha, eki eldiń Úkimet basshylarynyń qatysýymen bilim berý, terrorızmge qarsy is-qımyl, qylmystyq jáne azamattyq ister boıynsha quqyqtyq kómek salalarynda ekijaqty yntymaqtastyqty sapaly, jańa deńgeıge shyǵarýǵa arnalǵan birqatar kelisim men memorandýmǵa qol qoıylady.
«Eki eldiń isker toptary ókilderiniń qatysýymen Qazaqstan-Mońǵolııa bıznes-forýmyn ótkizý, «Astana» halyqaralyq qarjy ortalyǵyna, halyqaralyq «Jasyl tehnologııalar» ortalyǵyna jáne ınvestıtsııalyq jobalar men kásiporyndarǵa barý josparlanǵan. Mońǵolııa úkimeti basshysynyń resmı sapary ekijaqty memleketaralyq qatynasty damytýda mańyzdy oqıǵa bolmaq», - dedi Aıbek Smadııarov.
