Astanada «KazAgro-2023» kórmesi ótip jatyr
Elordada dástúrli «KazAgro - 2023» jáne «KazFarm -2023» halyqaralyq kórmeleri resmı túrde ashyldy, dep habarlaıdy Kazinform.
19-21 qazan aralyǵynda ótetin halyqaralyq kórmede otandyq tuqym selektsııasynan bastap daıyn ónimder men zamanaýı tehnologııalar, aýyl sharýashylyǵy ónimderin óndirýge, saqtaýǵa, qaıta óńdeýge jáne logıstıka tehnıkalary qoıylǵan. Sonymen qatar arnaıy jabdyqtar, quraldar da bar.
Odan bólek, kórmede Qazaqstandaǵy mal sharýashylyǵy jáne et-sút ónerkásibi boıynsha embrıondardan bastap mal sharýashylyǵy salasynyń túrli daıyn ónimderi qoıylǵan.
«Kezekti on tórtinshi «KazAgro-2023» jáne «KazFarm-2023» halyqaralyq kórmesine qosh keldińizder! Bıylǵy kórmege álemniń 20-dan astam elinen aýyl sharýashylyǵy mamandary kelip otyr. Qatysýshylar mal sharýashylyǵy, ósimdik salasy boıynsha ónimderin usynady. Kelýshilerdiń aýyl sharýashylyǵy tehnıkalaryn, onyń ishinde Qazaqstanda óndiriletin jańa ónimdermen tanysý múmkindigi bar. Onyń ishinde sapaly tuqymdar, mıneraldy tyńaıtqyshtar jáne taǵy basqa. Ósimdikterdi tıimdi qorǵaý – jaqsy ónim alýdyń kepili», - dedi Aýyl sharýashylyǵy mınıstri Aıdarbek Saparov kórmeniń ashylý saltanatynda.
Uıymdastyrýshylardyń aıtýynsha, úsh kún boıy ótetin «KazAgro/KazFarm-2023» halyqaralyq kórmesinde álemdik jetekshi agro kontsernderdiń birqatar jańa aýyl sharýashylyǵy tehnıkalary men jabdyqtary, Qazaqstannyń agroónerkásiptik kesheni, agrarlyq ǵylymdaǵy sońǵy jetistikter men ınnovatsııalyq tehnologııalar usynylady.
Sondaı-aq kórme aıasynda halyqaralyq konferentsııa, dóńgelek ústel men kezdesýler uıymdastyrylady.
