Astanada kámeletke tolmaǵan baladan aqsha bopsalaǵandar 10 jylǵa sottaldy

ASTANA. KAZINFORM — Elordada kámeletke tolmaǵan baladan aqsha bopsalaǵan qylmystyq toptyń tórt múshesi sot úkimimen 10 jylǵa bas bostandyǵynan aıyryldy.

Tergeý málimetinshe, sottalǵandar jábirlenýshiniń shetelge oqýǵa baratynyn jáne onyń ata-anasynyń edáýir qarjysy bar ekenin bilip, ózara kelisip, jasóspirimnen 20 mıllıon teńge talap etken.

Qylmystyq top músheleri jábirlenýshige psıhologııalyq qysym kórsetip, atys qarýyn kórsetken. Sonyń nátıjesinde olar 4 mıllıon teńge kóleminde aqsha alǵan.

Keıin toptyń eki múshesi jábirlenýshiden taǵy 100 myń teńge almaq bolǵan sátinde qolǵa tústi. Jedel izdestirý sharalary barysynda qalǵan eki kúdikti de ustaldy.

— Sot barysynda memlekettik aıyptaýshynyń dálelderi tolyq kólemde rastalyp, sottalǵandardyń kinási dáleldendi. Olarǵa Qylmystyq kodekstiń 194-baby boıynsha (qorqytyp alý) aıyp taǵyldy. Sot úkimimen árqaısysy 10 jyl merzimge bas bostandyǵynan aıyryldy. Jábirlenýshige keltirilgen materıaldyq shyǵyn tolyq óteldi. Sondaı-aq moraldyq zalal retinde 2 mıllıon teńge óndirildi, — delingen habarlamada.

Aıta keteıik, QR Qylmystyq kodeksine sáıkes qorqytyp alý áreketi úshin 15 jylǵa deıingi merzimge bas bostandyǵynan aıyrý jazasy kózdelgen. Bul qylmys úshin keıbir jaǵdaıda 14 jastan bastap qylmystyq jaýapkershilik qarastyrylady.

Eger mundaı áreketti kórsetilgen jasqa tolmaǵan adam jasasa, zańǵa sáıkes onyń ata-anasy nemese zańdy ókilderi jaýap beredi.

Eske salaıyq, buǵan deıin elimizde esirtki qylmysyna qarsy kúres kúsheıtildi. Qazir elde esirtkige táýeldi 18 myń adam dıspanserlik tirkeýde tur. Onyń 66 paıyzy — kámeletke tolmaǵan jastar.