Astanada halyqaralyq geologııalyq forým ótedi
ASTANA. KAZINFORM — Astanada 2026 jyldyń 2-3 sáýir kúnderi Ortalyq Azııa elderiniń úkimetteri, memlekettik organdary, ulttyq geologııalyq qyzmetteri men iri bıznes kompanııalary ókilderiniń basyn qosatyn GEOSCIENCE & EXPLORATION CENTRAL ASIA halyqaralyq geologııalyq forýmy ótedi. Bul týraly QR Ónerkásip jáne qurylys mınıstrligi habarlady.
Sharaǵa 20-dan astam eldiń ókilderi qatysyp, geologııalyq resýrstardy zertteý, boljaý jáne ıgerý salasyndaǵy strategııalyq máselelerdi talqylaıdy. Forýmda sala kóshbasshylary men sheshim qabyldaıtyn tulǵalar geologııa salasynyń strategııalyq damýy, halyqaralyq yntymaqtastyqtyń jańa úlgileri jáne jer qoınaýyn turaqty paıdalaný men uzaq merzimdi ınvestıtsııalar taqyryptaryn qarastyrady.
— Bul forým — geotehnologııalar, jer qoınaýyn paıdalanýdy tsıfrlandyrý jáne ESG baǵytyndaǵy sheshimder usynýǵa, sondaı-aq salalyq seriktestikti damytýǵa múddeli kompanııalar men sarapshylar úshin biregeı alań. Qatysýshylar memlekettik qurylymdar, ınvestorlar jáne salalyq kóshbasshylar men tikeleı dıalog ornatyp, strategııalyq talqylaýlarǵa qatysyp, halyqaralyq memorandýmdarǵa qol qoıý múmkindigine ıe bolady. Sonymen qatar geologııalyq naryqtyń bolashaǵy qalyptasyp jatqan óńirde jańa naryqtarǵa shyǵý jáne óz pozıtsııalaryn nyǵaıtý úshin tıimdi alań bolady, — delingen aqparatta.
Forým baǵdarlamasy:
- eki kúndik taqyryptyq sessııalar;
- memlekettik organdar men halyqaralyq uıymdar ókilderiniń qatysýymen plenarlyq pikirtalastar;
- ozyq tehnologııalar kórmesi;
- ınnovatsııalyq jobalardyń prezentatsııalary;
- jas mamandardy qoldaýǵa arnalǵan arnaıy sessııalar.
GEOSCIENCE & EXPLORATION CENTRAL ASIA — ǵylym, bıznes jáne memlekettiń seriktestigin arttyryp, geologııalyq naryqtaǵy strategııalar men múmkindikterdi aıqyndaıtyn negizgi dıalog alańy.
Buǵan deıin Qazaqstandaǵy geologııalyq zertteýde qandaı jetistikter bar ekendigi jóninde jazǵan bolatynbyz.