Astanada erekshe balalar arnaıy mamandary joq jalpy synypta bilim alǵan

ASTANA. KAZINFORM — Erekshe bilim berý qajettilikteri bar balalardyń quqyqtaryn qorǵaý boıynsha sharalar qabyldandy, dep habarlaıdy Astana qalasynyń prokýratýrasy.

— Túsken ótinishti qaraý barysynda erekshe bilim berý qajettilikteri bar bir top oqýshynyń arnaıy jaǵdaılar jasalmastan jáne beıindi mamandardyń — defektologtardyń, logopedterdiń jáne pedagog-psıhologtardyń qatysýynsyz jalpy bilim beretin synyptarda oqyǵany anyqtaldy. Mundaı buzýshylyqtar balalardy olardyń jeke erekshelikteri men qajettilikterin eskere otyryp bilim alý múmkindiginen aıyrdy, — delingen habarlamada.

Qalalyq prokýratýranyń prokýrorlyq qadaǵalaý aktisiniń nátıjesinde Astana qalasyndaǵy mektepte zańnama talaptaryna sáıkes jabdyqtalǵan jáne bilikti mamandarmen qamtamasyz etilgen arnaıy (túzetý) synyby ashyldy.

Qabyldanǵan sharalar oqýshylardyń buzylǵan quqyqtaryn qalpyna keltirýge, sondaı-aq olardyń tolyqqandy bilim alýyna, damýyna jáne áleýmettik beıimdelýine jaǵdaı jasaýǵa múmkindik berdi.

Kámeletke tolmaǵandardyń, onyń ishinde erekshe bilim berý qajettilikteri bar balalardyń quqyqtaryn qorǵaý baǵytyndaǵy aýdan prokýratýrasynyń jumysy júıeli túrde jalǵasýda.

Osyǵan deıin Aqtaýdaǵy túzetý ortalyǵynda erekshe balalardyń quqyqtary buzylǵanyn jazǵanbyz.