Astanada dástúrli qysqy trıatlonnan jarys ótti

ASTANA. KAZINFORM – Búgin elordadaǵy Trıatlon saıabaǵynda qysqy trıatlonnan dástúrge aınalǵan jarys ótti. Oǵan bas aıaǵy 200-ge jýyq áýesqoı sportshylar qatysy.

«Astana tórinde trıatlon jarysyn 4-shi márte ótkizip jatyrmyz. Bıylǵy jarystyń ereksheligi retinde estafeta boıynsha jeńimpazdar anyqtaldy. Alǵashqy jarysymyzda 50-deı ǵana sportshy qatyssa, endi olardyń qatary 3-4 esege kóbeıdi. Búgingi jarys barysyn qadaǵalaı otyryp, kelesi jyly balalarǵa da arnap saıys túrin kirgizýdi josparlaımyz. Dál osy trıatlon jarysynda jazdyq sporttyń myqtylary men shańǵynyń kóshbasshylary sońynan deıin chempıon bolýǵa baryn salady. Áıtse de, sheshýshi saıys shańǵy bolǵandyqtan, Soltústik óńirdiń týmalary top jarady», - dedi Astana qalasynyń Trıatlon federatsııasynyń prezıdenti Evgenıı Bolgert.

Jarys barysynda qatysýshylar 3 túrli sport túri boıynsha saıysqa tústi. 

• júgirý – 2,5 shaqyrym;

• velosport – 3 shaqyrym;

• shańǵy jarysy – 2,5 shaqyrym.

Uıymdastyrýshylardyń pikirinshe Astanadaǵy jarysqa tek qana qala turǵyndary ǵana emes, Qaraǵandy, Kókshetaýdan da arnaıy túrde keletinderdiń qarasy kóp.

Kúnniń aıazdyǵyna baılanysty týrnır tańǵy 9:00-den 12-ge aýystyrylǵan edi. Bul jaıynda qatysýshylar da óz oıyn aıta ketti.

«Aýa-raıy -20 gradýstan asyp tursa da, búgingi kún jarys úshin óte yńǵaıly boldy. Shańǵy sportynan ulttyq qqramanyń múshesi bolsam da, dál osyndaı trıatlonǵa birinshi ret qatystym. Ár sportshy tek jaqsy kórsetkishke qol jetkizgisi keledi. Mine sol josparym oryndaldy», - dedi Şýchınskten arnaıy kelgen Svıatoslav Matasov. 

Trıatlon federatsııalarynyń aıtýynsha, bul 2024 jyldaǵy alǵashqy jarys. Jyl sońyna deıin áli 10-nan astam týrnır ótkizilip upaı sandary boıynsha jalpy jeńimpazdar belgili bolady.

Jarys sońynda ár jas tobyndaǵy trıatlon jeńimpazdary marapattalyp, aqshalaı syıaqy berildi.

Endi kezekti trıatlon básekesi naýryz aıynyń ortasynda jabyq keshendegi sport saraıynda uıymdastyrylady.