Astanada bir kúnde 500-den astam adam jaraqat aldy

ASTANA. KAZINFORM – Elordada bir táýlik ishinde 508 adam jaraqat alǵan. Bul týraly qalalyq Densaýlyq saqtaý basqarmasynyń baspasóz qyzmeti habarlady.

«12 aqpanda saǵat 8:00-den 13 aqpanda saǵat 8:00-ge deıin 508 adam jaraqat pýnktterine júgindi. Onyń ishinde 262 patsıent kóshede jaraqat alǵan. Bıyl 7 aqpannan 12 aqpanǵa deıin qaladaǵy jaraqat pýnktterine 2 200-ge jýyq adam qabyldandy. Onyń ishinde 1 000-nan astamy dalada júrip jaraqat alǵan», - delingen habarlama.

Aıta ketsek, elorda ákimdigi jaýyn-shashynnyń mólsheri aılyq normadan asyp túskenin habarlady. 

«Qalada birneshe kún boıy qalyń qar jaýyp, boran soqty. Aýa raıynyń kúrt ózgerýine baılanysty joldar men trotýarlar muzǵa aınaldy. Kommýnaldyq qyzmetter táýlik boıy kúsheıtilgen rejımde jumys istep jatyr», - deıdi ákimdikten.

Aqparatta aıtylǵandaı, ótken túnde kommýnaldyq qyzmet qaladan 38 myń tekshe metr qar shyǵarǵan.