Astanada BAQ ókilderi asyq atyp, voleıbolda baq synady
ASTANA. KAZINFORM – Elordada alǵash ret buqaralyq aqparat quraldarynyń ókilderi arasynda Spartakıada ótti. Láńgi tebý, bes asyq, asyq atý jáne voleıbol sekildi ulttyq jáne komandalyq oıyn túrlerinen 100-ge jýyq jýrnalıst baq synasty.
«Jumysshy mamandyqtarynyń jyly» aıasynda ótken básekeni Astana qalasy Dene shynyqtyrý jáne sport basqarmasy uıymdastyrdy.
– Spartakıadanyń basty maqsaty – buqaralyq sportty nasıhattaý, jýrnalıster arasynda salaýatty ómir saltyn dáripteý jáne shyǵarmashylyq ujymdar arasyndaǵy yntymaqtastyqty nyǵaıtý. Sonymen qatar bul shara «Jumysshy mamandyqtarynyń jyly» aıasynda ótkizilip, ulttyq oıyndar arqyly tól mádenıetimizdi jańǵyrtýǵa da úles qosty. Spartakıada – tek saıys alańy ǵana emes, bul – kásibı qarym-qatynasty nyǵaıtatyn, sergektik pen seriktestikti arttyratyn orta. Bul joly da jarys tartysty ótip, jýrnalıster ózderiniń tek qalam ustaýda ǵana emes, sportta da sheber ekendikterin kórsetti. Atalǵan dástúrli shara aldaǵy ýaqytta da jalǵasyn tabatynyna senim mol, - deıdi Astana qalasynyń Dene shynyqtyrý jáne sport basqarmasynyń qyzmetkeri Madına Aıtqalıeva.
Láńgi tebý saıysynda «Habar» agenttiginiń jýrnalısi Maqsat Serikjanov 83 upaımen top jardy. Júldeli ekinshi oryn 79 upaı jınaǵan «Qazaq radiosy» ókili Muqtar Turtaıulyna buıyrdy. Al qola júldeni «Habar» agenttiginiń taǵy bir qatysýshysy Muhammedjan Temirov 69 upaımen enshiledi.
Al bes asyq jarysynan «RTRK Qazaqstan» redaktory Nurǵaısha Ábdýahıt úzdik atandy. Ekinshi oryndy Sporttyq medıtsınalyq ortalyǵynyń qyzmetkeri Tańsholpan Ryskeldına ıemdense, №10 shaıbaly hokkeı sport mektebinen kelgen Aınur Ýmralınova úshinshi orynǵa jaıǵasty.
Asyq atý básekesinde qatysýshylar komandamen baq synady. Bul saıysta «RTRK Qazaqstan» komandasy jeńimpaz ataǵyna ıe boldy. Al «Qazaq radiosy» men «Habar» agenttiginiń komandalary júldeli úshtikti tolyqtyrdy.
– Biz asyq atý básekesinde komandamyzben 1-oryn aldyq. Bizdiń komandanyń kóshin bastaǵan Sovethan Jaǵıuly esimdi ardager oıynshymyz. Odan soń Tileýles Ertileýuly degen aǵamyz bar. Ol kisi de ardager. Sol kisilerdiń qataryna men de qosylyp, 3 adam 1 asyq atý quramasyn jasaqtap, altyn medal aldyq. Bul – bizdiń bala kúnimizden búginge deıin tastamaı, keıde aýlada ózimizdiń de bala-shaǵamyzǵa úıretip júrgen oıyn. Bul oıyn sabyrlyqty, saqtyqty, mergendikti talap etedi, - deıdi jeńimpaz atanǵan quramanyń múshesi Muhamedálı Bolatuly.
Spartakıadada BAQ qyzmetkerleri voleıboldan da ózara baq synady. Bul synda «Habar» agenttiginiń komandasy fınalda «Qazaq radiosy» ujymyn 2:0 esebimen jeńip, qarsylastaryn qapy qaldyrdy. Úshinshi oryn úshin ótken kezdesýde «Egemen Qazaqstan» ujymy qalalyq sport basqarmasynan quralǵan «Tarlan» komandasyn san soqtyryp, júldeli orynǵa ıe boldy.
Shara barysynda úzdik óner kórsetip, tóreshilerdiń kózine túsken oıynshylar da marapattaldy. Jýrnalıster arasynda uıymdastyrylǵan Spartakıadadaǵy úzdikter tizimi mynadaı:
Úzdik shabýylshy – Jambyl Jambolat («Qazaq radiosy»)
Úzdik úılestirýshi – Baıan Súleımenqyzy («Egemen Qazaqstan»)
Úzdik oıynshy – Esenbol Imanǵazy («Habar»)
Úzdik qorǵaýshy – Daıana Toqtaǵulova («RSN»)
– Jarystyń uıymdastyrý deńgeıi óte joǵary ótti. Qatysýshylardyń ýaqytyn únemdeý maqsatynda voleıbol 2 alań, asyq atý sportynan 2 mejeli aımaq boldy. Jarystardyń barlyǵy eshkimniń ýaqytyn joǵaltpaı tez ótýine sep boldy. Al básekege qatysýshylardyń bári de sheber. Ásirese, ulttyq sport túrlerinen bala kúninen oınaǵan, óz-ózine senimdi qatysýshylar keldi. Saıys óte tartysty ári qyzyqty ótti. Bul jaı ǵana jarys, kezdesý emes, mereke ekenin de sezindirdi. Osyndaı sharalardyń arqasynda kópten kórmegen, tipti kezinde birge oqyǵan áriptesterimizben de dıdarlasyp jatamyz. Mundaı sharalar jarystan bólek áriptestiktiń de ary qaraı damýyna óz úlesin qosady. Meni bul sharanyń aldaǵy ýaqytta dástúrli túrde ótetini qýantty, - deıdi jarys qatysýshysy Muhamedálı Bolatuly.
Báseke qatysýshylarynyń oıynyna kásibı mamandar tórelik etken.
– Jarysqa Astana qalasynyń Dene shynyqtyrý jáne sport basqarmasyna qarasty sport mektepteriniń joǵary sanatty jattyqtyrýshylary men tájirıbeli bapkerleri tórelik etti. Olar ár sport túri boıynsha tereń bilimi men tájirıbesi bar mamandar retinde jarystyń ádil ári tartysty ótýine úles qosty. Ásirese ulttyq oıyndarǵa arnaıy mamandanǵan tóreshiler qatysyp, qatysýshylardyń sheberligin dál ári ashyq baǵalady, – deıdi uıymdastyrýshylar.
Astana qalasy Dene shynyqtyrý jáne sport basqarmasy basshysynyń orynbasary Azamat Aǵzamov, qalalyq Kommýnıkatsııalar qyzmetiniń basshysy Abzal Dosyman jáne sporttyq-buqaralyq is-sharalardy ótkizý dırektsııasynyń basshysy Azamat Belgıbaev sharaǵa arnaıy qatysyp, jeńimpazdardy quttyqtady. Júldegerler kýbok, medal jáne arnaıy dıplomdar tabystaldy.
Aıta keteıik, elimizde ulttyq sport túrlerine qyzyǵýshylyq artyp keledi.
Tipti, Astanada ulttyq sport túrlerinen kásibı bapkerler daıyndalyp jatyr.