Astanada alǵash ret paravoleıboldan Azııa chempıonaty ótedi
Jarysqa Azııanyń 8 elinen, sonyń ishinde Qazaqstan, Japonııa, Taıland, Iran, Irak, Ońtústik Koreıa, Mońǵolııa, Úndistannan 200-den astam sportshy qatysady.
Chempıonat jeńimpazdary 2024 jyly Parıjde ótetin XVII Jazǵy Paralımpıada oıyndaryna qatysýǵa lıtsenzııa alady.
«Biz tarıhta alǵash ret elordamyzda voleıboldan Azııa chempıonatyn ótkizip otyrmyz. Mundaı deńgeıdegi halyqaralyq jarystardy uıymdastyrý árqashan úlken jaýapkershilikti júkteıdi. Óıtkeni mundaı is-sharalar memleketimizdiń halyqaralyq arenadaǵy bedelin nyǵaıtýǵa yqpal etedi. Osy is-shara barysynda memleket tarapynan jan-jaqty qoldaý alyp otyrmyz. Bizge «Sport qory», «Samuryq-Qazyna» jáne Astana qalasy ákimshiligi de qoldaý kórsetip jatyr. Birlesken kúsh-jigerdiń arqasynda chempıonattyń joǵary deńgeıde ótetinine senimdimin», – dedi Qazaqstan Paravoleıbol federatsııasynyń bas hatshysy Batyr Qadyrbaıuly.
Aldaǵy chempıonatta Qazaqstan erler men áıelder sanatyndaǵy ulttyq quramalaryn tanystyrady. Aıta ketý kerek, Qazaqstan erler quramasy halyqaralyq arenada birneshe dúrkin jeńimpaz atanyp, álemniń úzdik komandalary reıtınginde 7-shi, Azııa elderi arasynda 2-shi orynda tur. Al Qazaqstan áıelder quramasy mundaı chempıonatqa birinshi ret qatysaıyn dep otyr.
Chempıonattyń ashylýy 3 shilde kúni saǵat 11:00-de «Jekpe-jek saraıy» sport kesheninde ótedi. Alǵashqy oıyndar sol kúni saǵat 10:00-de bastalyp, Qazaqstan quramasy Japonııa quramasymen oınaıdy.
