Astanada aqyn A. Shaıahmettiń keshi ótti
ASTANA. 4 mamyr. QazAqparat - Búgin Astana qalasyndaǵy Mustafa Shoqaı atyndaǵy №51 mektep-gımnazııada aqyn, Qazaqstan Jazýshylar odaǵynyń múshesi, fılologııa ǵylymdarynyń kandıdaty, Ahmet Baıtursynuly atyndaǵy Qostanaı memlekettik
ýnıversıtetiniń professory Aqylbek Shaıahmetpen kezdesý bolyp ótti. Mektep ujymy aqynnyń jyr jınaqtarynan kórme uıymdastyrdy.
Jalyndy jyrlar oqylyp, ásem ánder shyrqalǵan ádebı keshke bilim ordasynyń ustazdary men shákirtteri jáne Qazaq ulttyq óner ýnıversıtetiniń stýdentteri qatysty.
№51 mektep-gımnazııa dırektorynyń oqý isi jónindegi orynbasary Qanshaıym Mirjaqyp ádebıet dárisi tárizdi óner ıelerimen, tanymal qalamgerlermen júzdesýler ótkizý, shákirtterdiń sanasyna poezııanyń qundylyǵyn uǵyndyrý bilim ordasynda dástúrge aınalyp kele jatqanyn aıtty. Qostanaılyq aqynnyń nemereleri osy bilim uıasynda tálim alýda. Máselen, mektep-gımnazııanyń túlegi Bekzat Aqylbek qazir Qazaq ulttyq óner ýnıversıtetiniń stýdenti bolsa, ekinshi bir nemeresi Anar Aqylbek 8 synypta oqyp júr.
Aqyn keshinde Bekzat Aqylbek atasynyń sózine jazylǵan ánderdi oryndady. Anar aqynnyń óleńin oqydy.
Aqylbek Qojauly kesh barysynda óz óleńderin oqyp, oqýshylardyń suraqtaryna jaýap berdi. Mektep oqýshylary aqynnyń jyrlaryn jatqa aıtty, sondaı-aq ózderiniń tyrnaqaldy týyndylaryn oqyp, aqyl-keńes aldy.
«Men elimizdiń jas Elordasynda bilimdi de ónerli urpaqtyń ósip kele jatqanyna kóz jetkizdim. Mektep-gımnazııada óleń shyǵaratyn, án aıtatyn ónerli oqýshylar kóp eken. Jastarymyzdyń bilimde alǵyr, ónerde júırik bolýy tálim bergen ustazdarynyń arqasy»,- deıdi aqyn Aqylbek Shaıahmet.
Osyndaı kesh uıymdastyrǵan bilim ordasyna rızashylyǵyn bildirgen A.Shaıahmet kesh sońynda óziniń birneshe prozalyq jáne poezııalyq jınaqtaryn mektep-gımnazııanyń kitaphanasyna syıǵa tartty.
