Astanada Jeńis kúnine oraı ardagerlerge qandaı tólem túri berildi
ASTANA.KAZINFORM - Elorda ardagerlerine 9 mamyr – Jeńis kúniniń qurmetine dástúrli túrde birjolǵy áleýmettik tólemder qarastyrylǵan, dep jazdy Astana ákimdiginiń resmı saıty.
Astana qalasy máslıhatynyń 2023 jylǵy 3 qazandaǵy № 84/10-VIII sheshimimen bekitilgen «Astana qalasynda áleýmettik kómek kórsetý, onyń mólsherin belgileý jáne muqtaj azamattardyń jekelegen sanattarynyń tizbesin aıqyndaý qaǵıdasyna» sáıkes 9 mamyrǵa ardagerlerge bir rettik áleýmettik tólemder qarastyrylǵan.
Sonymen UOS ardagerine 5 mln teńge mólsherinde tólem berildi.
Sol sııaqty ózge de mynandaı tólem jasaldy:
– jeńildikter boıynsha UOS teńestirilgen ardagerler, Chernobyl atom elektr stantsııasy apatynyń zardaptaryn joıýǵa qatysýshylardan basqa (UOS kezinde qyzmet etken áskerı qyzmetkerler; fashıstik Germanııaǵa qarsy soǵys qımyldaryna qatysqan adamdar; Lenıngrad qalasyndaǵy blokada kezinde jumys istegen azamattar; kontslagerlerdegi, gettolardaǵy jáne basqa da májbúrlep ustaý oryndaryndaǵy kámeletke tolmaǵan tutqyndar; áskerı maqsattaǵy obektilerdegi basqa da radıatsııalyq apattar men avarııalardyń, ıadrolyq synaqtardyń saldarynan múgedek bolǵan adamdar jáne múgedektigi ata-anasynyń biriniń radıatsııalyq sáýle alýymen genetıkalyq baılanysty olardyń balalary) 476 adam – 45 aılyq eseptik kórsetkish (AEK) mólsherinde (194 625 teńge);
– basqa memleketterdiń aýmaǵyndaǵy urys qımyldarynyń ardagerleri, Aýǵanstandaǵy urys qımyldarynyń ardagerlerinen basqa (Tájikstan-Aýǵanstan ýchaskesinde Táýelsiz Memleketter Dostastyǵynyń shekarasyn qorǵaýǵa qatysqan áskerı qyzmetshileri; Iraktaǵy halyqaralyq bitimgershilik operatsııaǵa bitimgerler retinde qatysqan Qazaqstan Respýblıkasynyń áskerı qyzmetshileri; Taýly Qarabahtaǵy etnosaralyq qaqtyǵysty retteýge qatysqan áskerı qyzmetshiler, sondaı-aq burynǵy KSR Odaǵy ishki ister jáne memlekettik qaýipsizdik organdarynyń basshy jáne qatardaǵy quramynyń adamdary) 1167 adam – 45 AEK (194 625 teńge) mólsherinde;
– Qazaqstan Respýblıkasynyń «Ardagerler týraly» Zańynyń kúshi qoldanylatyn basqa da adamdar (tyl eńbekkerleri, qaza tapqan áskerı qyzmetshilerdiń otbasylary; Uly Otan soǵysynyń qaıtys bolǵan múgedeginiń áıelderi) 1753 adam – 15 AEK mólsherinde (64 875 teńge).
Astanada 9 mamyrǵa oraı barlyǵy 3398 adamǵa birjolǵy áleýmettik tólem berildi.
Sonymen qatar Uly Otan soǵysy ardagerine jáne jeńildikter boıynsha UOS teńestirilgen ardagerler jergilikti bıýdjetten kelesideı áleýmettik kómek túrleri qarastyrylǵan:
• aı saıyn kommýnaldyq qyzmetterdi tóleýge aqshalaı tólemder;
• tegin dári-dármekpen qamtamasyz etý;
• qalalyq jolaýshylar kóliginde jeńildikti jol júrý
• sanatorlyq-kýrorttyq emdelý.
Buǵan deıin Túrkistan oblysynda qansha ardager turatynyn jazǵan bolatynbyz.
Qyzylorda oblysynda Jeńis kúnine oraı Ekinshi dúnıejúzilik soǵysqa qatysýshylarǵa beriletin birrettik tólem artty.
