Astanada 17 elden kelgen 400-den astam medıtsına mamany bas qosty
ASTANA. KAZINFORM - Astanada álem elderiniń jetekshi mamandary medıtsınaǵa ınnovatsııalardy engizý, kadrlyq áleýetti damytý jáne ǵylym men klınıkalyq tájirıbe arasyndaǵy baılanysty nyǵaıtý taqyrybyn talqylap jatyr.
QR Prezıdenti Іs basqarmasy Medıtsınalyq ortalyǵy uıymdastyrǵan halyqaralyq ǵylymı-praktıkalyq konferentsııa óz jumysyn bastady. Sharaǵa Qazaqstan men álemniń 17 elinen kelgen 400-den astam jetekshi dáriger, ǵalym jáne densaýlyq saqtaý salasynyń menedjerleri qatysyp jatyr.
Olardyń qatarynda Avstrııa, Qytaı, Germanııa, Ońtústik Koreıa, Túrkııa, Reseı, Shveıtsarııa, Norvegııa, Japonııa jáne basqa memleketterdiń ókilderi bar.
Konferentsııanyń ashylýynda sóz sóılegen QR Densaýlyq saqtaý mınıstri Aqmaral Álnazarova mınıstrlik pen Medıtsınalyq ortalyq arasyndaǵy yntymaqtastyqtyń mańyzdylyǵyn atap ótti.
«QR Densaýlyq saqtaý mınıstrligi men QR Prezıdenti Іs basqarmasy Medıtsınalyq ortalyǵynyń tıimdi áriptestigi – memlekettik qurylymdardyń ult densaýlyǵyn nyǵaıtý jolyndaǵy jemisti yntymaqtastyǵynyń jarqyn úlgisi. Birlesken jumys aıasynda joǵary tehnologııalyq kómek, kadr daıarlaý, tsıfrlandyrý jáne ınnovatsııalardy engizý baǵyttarynda naqty nátıjeler bar. Sońǵy on jylda 35 klınıkalyq hattama, 19 jańa medıtsınalyq tehnologııa jáne robottandyrylǵan hırýrgııa ádisteri engizildi», – dedi mınıstr.
QR Prezıdentiniń keńesshisi Alekseı Tsoı Medıtsınalyq ortalyqtyń salalyq kóshbasshylyq rólin atap ótti: «QR Prezıdenti Іs basqarmasy Medıtsınalyq ortalyǵy otandyq densaýlyq saqtaý júıesinde jetekshi orynda. Munda úzdik mamandar shoǵyrlanǵan jáne zamanaýı tehnologııalar engizilgen. Búginde patsıentterdiń senimi – sapaly qyzmettiń basty kórsetkishi bolyp otyr».
Konferentsııa baǵdarlamasy kardıohırýrgııa, onkologııa, ıadrolyq medıtsına, neırohırýrgııa, terapııa, tsıfrlandyrý, farmatsevtıkalyq retteý, meıirger isi jáne medıtsınalyq kómektiń sapasyn basqarý sııaqty ózekti baǵyttardy qamtıdy. Forýmnyń basty maqsaty – ǵylym men klınıkalyq tájirıbe arasyndaǵy baılanysty nyǵaıtý, ınnovatsııalardy engizý jáne kadrlyq áleýetti damytý.
Sheteldik sarapshylar halyqaralyq medıtsınanyń sońǵy jetistikteri jaıly baıandady. Atap aıtqanda, DDU Eýropalyq óńirlik bıýrosynyń dırektory Hans Klıýge 2030 jylǵa deıingi Eýropalyq densaýlyq saqtaý strategııasynyń basymdyqtaryn tanystyrdy.
Germanııadan kelgen professor Andreas Kenıg densaýlyq saqtaý júıesinde tsıfrlyq tehnologııalar men jasandy ıntellektiniń tıimdiligin atap ótti.
Qytaıdyń professor Sýn Inglı ıadrolyq medıtsınanyń onkologııalyq aýrýlardy anyqtaýdaǵy rólin baıandady, al Ońtústik Koreıa professory Han Syn Hýn qashyqtan kardıohırýrgııany damytýdyń tájirıbesimen bólisti.
Qazaqstandyq mamandar klınıkalyq tájirıbeni standarttaý, tsıfrlandyrý, jasandy ıntellektini dıagnostıkalyq protsesterge engizý, az ınvazııaly hırýrgııa, robottandyrylǵan tehnologııalar, farmakologııalyq qaýipsizdik jáne ońaltýdyń jańa tásilderi týraly baıandama jasady.