Astana jáne Erevan arasynda alǵashqy áýe reısi ashyldy

EREVAN. QazAqparat - 31 mamyr kúni Astanadan Armenııaǵa attanǵan alǵashqy reıske ushaǵy Erevanǵa kelip jetti. Tasymaldaýshy qazaqstandyq «SCAT Airlines» áýe kompanııasy. Sapar aptasyna eki ret - sársenbi jáne senbi kúnderi jolaýshylar úshin qolaıly kúndizgi ýaqyttarda Boıng 737 ushaǵy arqyly júzege asyrylady. Sonymen qatar, sapar uzaqtyǵy 3 saǵat 40 mınýtty quraıdy, dep habarlaıdy «QazAqparat» HAA tilshisi.

Erevan «Zvartnots» áýejaıynda Astana-Erevan tikeleı alǵashqy reısin saltanatty túrde qarsy alý rásimi ótkizildi. Saltanatty sharaǵa qatysqan Armenııadaǵy Qazaqstannyń Tótenshe jáne Ókiletti elshisi Tımýr Orazaev eki qala arasyn jalǵaıtyn áýe baılanysy eki memleket ókilderiniń arasyndaǵy iskerlik baılanystardy arttyrýǵa oń yqpal etetindigine senim bildirdi.

«Meniń bul tamasha elge kelgenime bir jyl tolǵannan keıin, armıan jáne qazaqstandyq qoǵamnyń ótinishin eskere kele, Armenııa jáne Qazaqstan astanalaryn baılanystyratyn áýe qatynasyn ashý múmkindigi buıyrdy», - dedi Tımýr Orazaev alǵashqy reıske arnalǵan baspasóz máslıhaty barysynda.

Elshi T.Orazaevtyń aıtýynsha, Qazaqstan jáne Armenııa arasyn baılanystyratyn tikeleı reıs EKSPO-2017 kórmesi qarsańynda ashylýy kezdeısoq emes. Osy kezde týrısterdiń Armenııaǵa da aǵylady dep kútilýde.