Astana protsesi qandaı elderde kóp talqylandy
Bul týraly búgin "Parasat" júıeli zertteýler ınstıtýtynyń dırektory Nursultan Axmedııa málim etti, dep xabarlaıdy QazAqparat.
«Astana protsesiniń Sırııadaǵy qantógisti toqtatý joldaryn izdeýde jáne oǵan alǵysharttar qalyptastyrýdaǵy mańyzy erekshe ekendigin atap ótkimiz keledi. Birneshe márte ótken Astanadaǵy kelissózderden kórip otyrǵanymyz - qaqtyǵysýshy taraptar soǵysty beıbit jolmen sheshýge múddeli. Qazaqstan Sırııa qaqtyǵysy paıda bolǵannan beri soǵysty tek beıbit suxbat jolmen jáne bitimge kelý arqyly sheshý múmkin ekendigin atap ótken bolatyn. Bul oraıda, "Parasat" júıeli zertteýler ınstıtýty "Astana protsesiniń aldyn ala qorytyndylary, mańyzy men áleýeti" atty taldaý baıandamasyn daıyndaǵan bolatyn. Onda Sırııadaǵy qaqtyǵystardy sheshýdegi xalyqaralyq qaýymdastyqtyń yqpaly, ıaǵnı Máskeý, Jeneva, Vena, Astana kelissózderiniń nátıjeleri, kelissózder taraptarynyń ustanymdary, Astana protsesiniń mańyzy týraly baıandalǵan bolatyn. Sonymen qatar álemdik BAQ-taǵy Astana protsesi jónindegi jarııalanymdardyń mazmuny men sıpaty, Astana protsesine qatysyp jatqan Sırııanyń oppozıtsııalyq toptary týraly málimetter qamtylǵan edi», - deıdi N. Axmedııa.
Onyń aıtýynsha, bul málimetterdiń ishinde áleýmettik medıa keńistiginde júrgizilgen taldaý nátıjeleri de kirip otyr. Oǵan sáıkes, Astana protsesi jaıynda bir aıda 3 myńnan astam materıal jarııalanǵany belgili boldy.
"Kelissózderdiń kezekti kezeńin ótkizýge negizinen Túrkııa men Reseı bastamashyl boldy. Pikir almasýǵa AQSh pen ózge de Batystyq elder belsendi qatysqan joq. Osynyń áserinen aqparattyq jarııalanymdardyń berilýi túrli boldy. Degenmen Astana protsesiniń Sırııadaǵy axýaldy beıbit retteýdegi úlesiniń zor ekendigi eskerilip, álemdik BAQ-tyń úlken qyzyǵýshylyǵyn týdyrǵany sózsiz. Sońǵy aıda Astana protsesi týraly jarııalanymdar sany 3 myńnan asyp ketti. Muny 1 sáýir men 1 mamyr aralyǵynda áleýmettik medıaǵa júrgizilgen zertteý kórsetip otyr. Astana protsesi taqyryby negizinen áleýmettik jelilerde jáne blogtarda qozǵaldy. Zertteý kórsetip otyrǵanyndaı, jarııalanymdardyń geografııalyq alýandylyǵy da edáýir. Bul taqyryp Reseıde eń kóp talqylanǵan (54,9%), ınternettiń Ýkraına (14,7%) men Qazaqstan (5,9%) segmentinde de jarııalanymdar az bolmady. Sonymen qatar Astana protsesi jónindegi talqylaýlar AQSh, Ulybrıtanııa, Izraıl aýmaqtarynda da keńinen kórinis tapqan", - dedi ol.
Aıta keteıik, Astanada Sırııadaǵy daǵdarysty beıbit túrde retteý boıynsha joǵary deńgeıli kelissózderdiń tórtinshi kezeńi aıaqtaldy.
