Astana — Mılan tikeleı reısi ashylady

ASTANA. KAZINFORM — Qazaqstannyń Kólik vıtse-mınıstri Talǵat Lastaev Astanada ótken Qazaqstan-Italııa forýmynda eki el arasyndaǵy yntymaqtastyq jobalary týrly aıtyp berdi, dep habarlaıdy Kazinform tilshisi. 

Vıtse-mınıstr Qazaqstannyń geografııalyq ornalasýy basty artyqshylyq bolyp otyrǵanyn jetkizdi. Eýropa men Azııanyń ortasynda ornalasqan el retinde Qazaqstan ınfraqurylymdy damytyp, halyqaralyq bastamalarǵa, sonyń ishinde Eýropa odaǵynyń Orta dálizdi damytý jobasyna belsendi qatysyp keledi.

— Meniń oıymsha, dál qazir osy dálizdi tańdaıtyn ýaqyt keldi. Ásirese bizdiń elimiz arqyly tranzıt Qytaıdan Eýropaǵa júk tasymaldaý úshin balama baǵyt bola alady, — dedi Talǵat Lastaev.

Osy bastamany damytý úshin Talǵat Lastaev aýqymdy ınvestıtsııalar salý josparlanyp otyrǵanyn aıtty.

— Bul túrli kólik sektorlaryna shamamen 50 mıllıard dollar ınvestıtsııa salý degen sóz. Biz ıtalııalyq kompanııalardy olardyń biliktiligi, sapasy jáne joǵary tehnologııalary úshin belsendi tartýdamyz. Biz ınvestıtsııa tartý úshin tartymdy jaǵdaı, sonyń ishinde «Astana» halyqaralyq qarjy ortalyǵy sheńberinde qolaıly ınvestıtsııalyq klımat jasap otyrmyz. Oǵan qosa, arnaıy ekonomıkalyq aımaqtar quryp jatyrmyz, − dedi spıker.

Talǵat Lastaev Qazaqstan men Italııa arasyndaǵy áýe qatynasynyń keńeıtilip jatqanyn erekshe atap ótti. Qazir Almaty-Mılan tikeleı reısi oryndalyp júr, al jaqyn arada Astana-Mılan jańa baǵyty ashylady.

— Biz elderimizdi jaqyndatý, týrıstik baılanysty nyǵaıtý jáne ekonomıkalyq yntymaqtastyqty damytý úshin bar kúshimizdi salamyz, — dedi Kólik vıtse-mınıstri.

Buǵan deıin premer-mınıstr Oljas Bektenov Qazaqstan men Italııa arasyndaǵy ekijaqty taýar aınalymy 20 mlrd dollarǵa jýyqtaǵanyn aıtqan edi.

Sondaı-aq, Qazaqstan men Italııa arasynda 180 mıllıon eýroǵa memorandýmdar bekitildi.