Astana mektepterinde 28 myń oryn jetispeıdi
Bıyl Astanada 16 myń oqýshy syıatyn 11 mektep salynady. Bul týraly elordanyń bilim berý uıymdarynda oqý protsesin uıymdastyrý máseleleri boıynsha ákimniń orynbasary Eset Baıken aıtty, dep habarlaıdy QazAqparat tilshisi.
«Astananyń elimizdiń bas qalasy jáne iri megapolısi retinde tartymdylyǵy arta beredi, osyǵan baılanysty elorda halqynyń sany, mektep jasyndaǵy balalar sany da ósýde. Statıstıkalyq málimetke sáıkes, qazir Astanada 460 myńnan astam bala bar. Onyń ishinde balabaqshalarda – 66 myńnan astam bala, mektepterde – 260 myńǵa jýyq bala, kolledjderde – 34 myńnan astam bala oqıdy», - dedi Eset Baıken Astana kommýnıkatsııalar qyzmetinde ótken baspasóz máslıhatynda.
Elordanyń bilim berý júıesinde 734 uıym jumys isteıdi, olar 337 myń balany qamtyp otyr. Onyń 236-sy memlekettik, 488-i jeke menshikte, 171 mektep, 525 balabaqsha, 11 qosymsha bilim berý uıymy bar.
Sońǵy 4 jylda elordada 82 myń oryndyq 39 mektep salynǵanymen mektepterdegi oryn tapshylyǵy áli de 28 myńnan asady.
«Elorda mektepterindegi oryn tapshylyǵyn sheshý úshin sharalar qabyldanýda. Bıylǵy oqý jylynda 16 myń oryndyq 2 aýysymdaǵy 11 mektep salynady, onyń tórteýi óz jumysyn bastady. Taǵy 7 mektep jyl sońyna deıin paıdalanýǵa beriledi. 2024-2025 jyldary 69 myń oryndyq 30 mektep salý josparlanǵan. Qosymsha, «Jaıly mektep» ulttyq jobasy aıasynda 2025 jylǵa deıin 90 myń oqýshyǵa arnalǵan 24 mektep, onyń ishinde Nura jáne Esil aýdandarynda 15 mektep salynady. Ákimdik mektep qurylysy úshin 20 qosymsha jer ýchaskesin bekitti», - deıdi Eset Baıken.
Spıkerdiń aıtýynsha, aldaǵy 4 jylda 177 myń oqýshy syıatyn 65 mektep salý jáne paıdalanýǵa berý josparlanýda. Qabyldanǵan sharalar mektepterdiń shamadan tys júktemesin sheship qana qoımaı, 2035 jylǵa deıin oryn tapshylyǵy máselelerin tolyǵymen joıady dep kútilýde.
