Astana-Býdapesht áýe qatynasy 8 maýsymda ashylady

ASTANA. QazAqparat - Astana-Býdpaesht arasyndaǵy áýe qatynasy aǵymdaǵy jyldyń 8 maýsymynda ashylady. Bul týraly búgin Ortalyq kommýnıkatsııalar qyzmetindegi brıfıngte QR IDM Azamattyq avıatsııa komıteti tóraǵasynyń orynbasary Talǵat Lastaev málim etti, dep habarlaıdy QazAqparat.

«EKSPO-2017 halyqaralyq kórmesiniń ashylý qarsańynda 8 maýsym kúni Astana men Býdapesht arasynda tikeleı áýe qatynasy ornaıtyn bolady», - dep atap ótti ol.

Munan bólek, onyń aıtýynsha, EKSPO qarsańynda Astana-Helsınkı, Astana-Varshava, Astana-Ulanbatyr, Astana-Chelıabi, Astana-Erevan baǵyttarynda tikeleı áýe reısteri ashylady.

«Bul Qazaqstan jáne Majarstan arasyndaǵy dıplomatııalyq qarym-qatynastardyń 25 jyldyǵyna oraı eń qymbatty tartý bolmaq. Endi Astanany Býdapeshtten 5 saǵat ýaqyt bólip tur. Eki strategııalyq áriptestiń elordalary jaqyndasa tústi», - dedi óz kezeginde Majarstannyń Qazaqstandaǵy Tótenshe jáne ókiletti elshisi Andrash Baranı.

«Wizz Air Hungary Ltd» áýe kompanııasy kommýnıkatsııalar bóliminiń basshysy Tamara Valýa óz kezeginde Wizz Air áýe kompanııasy búgingi tańda Airbus A320 jáne A321 syndy 79 ushaqtan quralǵan jas áýe kemeleri parkin paıdalanyp 41 memlekettiń 139 áýejaıyna ushatyndyǵyn atap ótti.

«Astana-Býdapesht baǵytynyń ashylýy «Wizz Air» kompanııasy úshin aıtýly oqıǵa dep eseptelenedi. Óıtkeni bul bizdiń áýe kompanııamyzdyń Qazaqstandaǵy debıýti. Sondaı-aq bul baǵyt Qazaqstandy Eýropa Odaǵymen birinshi loý-kost áýe qatynasy jolymen qamtamasyz etedi jáne jalpy alǵanda Býdapeshtten ushatyn 2017 jylyna 4 mıllıonnan astam jolaýshy orynyn usynatyn 62 baǵytty paıdalanýǵa beredi», - dedi Tamara Valýa.