«Aspanda qalyqtaǵan arýlar» - respýblıkalyq basylymdarǵa sholý
ASTANA. Qazannyń 24-i. QazAqparat - Qazaq aqparat agenttigi respýblıkalyq basylymdarda qazannyń 24-i, senbi kúni shyqqan ózekti materıaldarǵa sholýdy usynady.
***
«Elbasy Nursultan Nazarbaevtyń Túrkııaǵa sapary keshe tańerteń Ankara qalasyndaǵy «Túrksoı» halqaralyq uıymynyń shtab-páterinde jalǵasty. Túrkııa astanasynyń eń kórikti jerleriniń birinde ornalasqan atalmysh uıymnyń shtab-páterinde Memleket basshysyn «Túrksoı» halqaralyq uıymynyń bas dırektory Dúısen Qaseıinov qarsy aldy. Munda Prezıdent uıymnyń qyzmetimen jan-jaqty tanysyp, oǵan múshe elderdiń ókilderimen kezdesti»,- dep jazdy «Egemen Qazaqstan» basylymynyń búgingi sany. Tolyǵyraq gazettiń «Túrki áleminiń tól uıymy» degen atpen berilgen maqalasynan oqı alasyzdar.
Sondaı - aq «Egemen Qazaqstan» gazetiniń búgingi sanyndaǵy «Altaýlyqpen kelisim-memlekettilik negizi» taqyrybymen berilgen suhbat 26 qazan kúni ótetin Qazaqstan halqy Assambleıasynyń kezekti XV sessııasyna arnalyp berilipti. Suhbatta Batys Qazaqstan oblysynyń ákimi, oblystyq Assambleıa tóraǵasy B.Іzmuhambetov Oral óńirinde qalyptasqan jyly shyraıly etnosaralyq qarym-qatynas tóńireginde sóz qozǵaıdy.
***
Elbasynyń Túrkııadaǵy saparyna nazar aýdarǵan «Aıqyn» gazeti de búgingi sanyndaǵy «Túrkııa Nazarbaevty túrki álemin biriktirýshi tulǵa retinde tanıdy» degen maqalasynda «Qazaqstan Prezıdenti Nursultan Nazarbaevtyń Túrkııaǵa jasaǵan resmı sapary nátıjeli boldy. Elbasynyń ushaǵy Ankara áýejaıyna qonysymen túrik aǵaıyndar Nazarbaevty úlken qoshemetpen qarsy aldy. Árıne, munyń ózindik sebepteri joq emes. Sebebi túbi bir túrki elderiniń mádenıetinde de, tarıhynda da, ustanǵan ádet-ǵurpynda da uqsastyqtar jetkilikti. Onyń ústine Túrkııa Nazarbaevty ısi túrki álemin biriktirýshi tulǵa retinde tanıdy», - dep jazdy.
«Assambleıa portalynyń tusaýy kesildi». Osy taqyryppen berilgen «Aıqyn» gazetindegi kelesi maqala Qazaqstan halqy Assambleıasynyń kópfýnktsıonaldy portalynyń jańǵyrtylǵan nusqasy dúnıege kelgendiginen habardar etipti.
***
«Ana tili» aptalyǵynyń búgingi sanynda «Bedeldi Uıymǵa tóraǵalyq - elimizdiń mereıi» degen taqyryppen Qazaqstan Respýblıkasynyń Memlekettik hatshysy- Syrtqy ister mınıstri Qanat Saýdabaevpen bolǵan suhbat jarııalanypty. Suhbatta EQYU -nyń bedeli men halqymyzǵa bereri jaıynda sóz bolady.
Atalmysh basylymnyń búgingi sanyndaǵy «Á. Nurpeıisov -adamzat taǵdyrynyń jyrshysy» degen taqyryppen berilgen kólemdi maqala qarymdy qalamger Á.Nurpeıisovtyń ónegeli ómiri týraly jazǵan.
«Sanaly ǵumyryn saharasyn zertteýge arnap, ultynyń joǵyn túgendegen Aqseleý Seıdimbek endi bizdiń ortamyzǵa oralmaıdy... Kózdi ashyp - jumǵansha qyzyq kún de óte shyǵypty. Qazaqtyń Aqseleýsiz ótken qyryq kúni». Osy basylymdaǵy «Aqseleý týraly ańyz» taqyrybymen berilgen maqala Aqseleý Seıdimbek aǵamyzǵa arnalǵan.
***
Stıýardessa qarapaıym tilmen aıtqanda, «aspan qyzy». Adamdar úshin bul mamandyq týraly bilý - óte qyzyq. ári Stıýardessa bolý kez kelgen janǵa buıyra bermeıtin «baqyt». Qyzdarǵa, ásirese, qııal -ǵajaıyp ertegisindeı elesteıtin bul mamandyq álemi rasynda ǵajaıypqa toly ma? Bul týraly bilgińiz kelse, «Astana aqshamy» gazetiniń búgingi sanynda «Aspanda qalyqtaǵan arýlar» degen taqyryptaǵy maqalaǵa nazar aýdaryńyz.
***
Nursultan Nazarbaevty búginde Túrkııada «qazaq Atatúrigi» dep ataıdy dep jazǵan «Kazahstanskaıa pravda» búgingi nómirinde Tuńǵysh Prezıdenttiń Qazaqstannyń memlekettik táýelsizdigin qalyptastyrýdaǵy orny men mańyzynyń aýqymdylyǵyn atap kórsetken. Onyń bedeli men kóshbasshylyǵy túrik áleminde joǵary dárejede moıyndalady. Muny óz sózinde Túrkııa Prezıdenti A. Gýl taǵy bir ret qýattady, deıdi basylym.
Memleket basshysynyń Túrkııaǵa resmı sapary barysyndaǵy qol jetken ýaǵdalastyqtar men kelisimder týrasynda «Lıter» jáne «Vechernıaıa Astana»gazetterinen de oqýǵa bolady.
Al «Ekspress K» gazeti «Forbes» jýrnalyna silteme jasaı otyryp, jaqsy kárilikti qarsy alýǵa bolatyn 10 eldiń tizimin jarııalaǵan. Gazettiń atap ótkenindeı, atalǵan tizimdi jasaý barysynda sarapshylar birneshe talaptardy negizge alǵan. Sonyń ishinde qaýipsizdik, týrıstik vıza alý erekshelikteri jáne medıtsınalyq qyzmet kórsetý máseleleri bar. Etken eńbektiń qartaıǵanda zeınetin kóretin eń jaqsy elder qaı memleketter ekenin bilgińiz kelse, «Ekspress K»gazetin oqyńyzdar.
