Áskerı teńiz kúshteri dronmen jabdyqtalady
Elimizdiń áskerı teńiz kúshterin sýasty jáne áýeden shabýyldaıtyn drondarmen jabdyqtaý josparlanyp otyr.
Bul týraly Aqtaýdaǵy áskerı teńiz bazasynda bıyl atqarylǵan jumystardy qorytyndylaý barysynda Qorǵanys mınıstrligi áskerı-teńiz kúshteriniń bas qolbasshysy Sáken Bekjanov aıtty, dep habarlaıdy Kazinform.
Prezıdent armııanyń jaýyngerlik qabiletin túbegeıli arttyrý jóninde naqty mindet qoıdy. Osyǵan sáıkes áskerı teńizshiler Kaspııdiń qazaqstandyq sektorynda daıyndyq deńgeıin jetildirip jatyr. Olar bıyl birneshe oqý-jattyǵý ótkizdi. Zymyrandy-artıllerııalyq korablderdi jaýyngerlik maqsatta qoldaný is-qımyldaryn pysyqtady.
Aıta keterligi, áskerı kemeler men jaǵalaý ınfraqurylymyn sýasty dıversııadan jáne ushqyshsyz basqarylatyn ushý apparatynan qorǵaýǵa basymdyq berilgen.
Álem elderinde júrip jatqan qarýly qaqtyǵystar dronnyń urysta tıimdiligin baıqatqan. Kontr-admıral jaýyngerlik flot qaýipsizdigin qamtamasyz etý úshin túrli maqsattaǵy drondardy qoldaný kún tártibinde turǵanyn aıtty.
- Aqtaý jáne Quryq portynyń qaýipsizdigin, sondaı-aq Transkaspıı dáliziniń qazaqstandyq bóligi arqyly júk aǵyny kedergisiz ótýin áskerı teńizshiler qamtamasyz etedi. Álem elderinde teńiz ınfraqurylymyna terrorlyq shabýyl jasaý jıilep barady. Osy turǵydan jaýyngerlik flot elimizge sýdan keletin qaterge kez kelgen ýaqytta qarsy turýǵa daıyn, dedi QR QK áskerı-teńiz kúshteriniń bas qolbasshysy Sáken Bekjanov.
Áskerı teńizshiler Kaspııde beısaýat júrgen sý kóligin tekserip, apatqa ushyraǵan kemege kómekke barady. Kúshtik qurylym jaǵalaýdaǵy strategııalyq nysandardy da kúzetedi. Porttarǵa qaýip tóngen jaǵdaıda desanttyq-shabýyldaý toby shuǵyl áreket etedi.
Aıta ketsek, Aqtaýda áskerı teńizshilerge tuńǵysh ret modýldi kazarma salynǵan edi.
