Áskerı kafedrada jańa baǵyt ashyldy
ASTANA. KAZINFORM – Ábilqas Saǵynov atyndaǵy Qaraǵandy tehnıkalyq ýnıversıtetiniń áskerı kafedrasynda zapastaǵy ofıtserlerdi daıarlaý aýqymy keńeıtildi.
Munda «Ushqyshsyz basqarylatyn avıatsııalyq júıeler» atty jańa baǵyt iske qosylyp, qazir 35 stýdent bilim alyp jatyr.
Búgingi tańda bul áskerı daıyndyqtaǵy eń suranysqa ıe baǵyttardyń biri bolyp otyr. Tehnologııalyq damý men zamanaýı qaqtyǵystar sıpatynyń ózgerýine baılanysty dron operatorlary urys alańynda negizgi mamandarǵa aınalýda.
Oqytý barlaý jáne topogeodezııa mamandyǵy boıynsha júrgiziledi. Bolashaq ofıtserler drondardy basqarýdy ǵana emes, sonymen qatar derekterdi taldaý, jergilikti jerdi baǵdarlaý, sheshim qabyldaý jáne eseptop quramynda úılesimdi áreket etýdi meńgeredi. Oqyp jatqan 35 stýdenttiń 15-i operator retinde, al qalǵan 20-sy eseptop komandıri retinde daıyndalýda.
Daıyndyqtyń bastapqy kezeńi arnaıy synypta ótedi. Munda kásibı basqarý pýltteri bar avtomattandyrylǵan jumys oryndary qarastyrylǵan. Jattyqtyrý kesheninde kýrsanttar pılottaý daǵdylaryn jetildirip, normatıvterdi tapsyrǵannan keıin ǵana naqty ushýlarǵa jiberiledi.
Tájirıbe barysynda olar ishki polıgonda jáne kúrdeli qurylys jaǵdaıynda tapsyrmalardy oryndaıdy. Bolashaq operatorlar áýe barlaýyn júrgizýdi, nysandardy anyqtaýdy, derekterdi naqty ýaqytynda jetkizýdi jáne ınternetsiz avtonomdy baılanys arnalary arqyly jumys isteýdi úırenedi.
Daıyndyqtyń sońǵy kezeńinde stýdentter atys júıesimen ıntegratsııany meńgeredi. Olar nysandardyń dál koordınattaryn berý, oq atýdy retteý jáne tapsyrmalardy joǵary dáldikpen ári jyldam oryndaýdy pysyqtaıdy.
— Mamandardy daıarlaý teorııalyq bilimdi, praktıkalyq daǵdylardy jáne stýdentterdiń motıvatsııasyn eskere otyryp júrgiziledi. Komandalyq jumys pen joǵary tehnologııalyq tehnıkany basqarýǵa degen kásibı qyzyǵýshylyqqa jiti kóńil bólinedi. Bolashaq ofıtserler ushqyshsyz basqarylatyn qurylǵylardy basqarý jarystarynda tabysty óner kórsetip júr. Sonyń ishinde AITU KazRoboDrone saıysyndaǵy nátıjeni aıtýǵa bolady. Ótken jyly ýnıversıtet komandasy respýblıkalyq deńgeıde birinshi oryn, al halyqaralyq arenada tórtinshi oryn ıelendi, — dedi «Arnaıy áskerlerdi urysta qoldaný» tsıklynyń basshysy zapastaǵy podpolkovnık Marat Istemesov.
Daıyndyq praktıkaǵa negizdelgen jáne urysqa barynsha jaqyn jaǵdaıda uıymdastyryldy. Kýrsanttar vırtýaldy trenajerlerden bastap kúrdeli taktıkalyq tapsyrmalardy oryndaýǵa deıingi joldan ótedi. Oqý barysynda zamanaýı ushqyshsyz basqarylatyn barlaý júıelerinen bastap manevrlik FPV-drondarǵa deıin qoldanylady. Stýdentter tehnıkanyń qurylysyn zerdelep, apparattardy jınaý men baǵdarlama jasaqtaýdy meńgeredi, sonymen qatar shekteýli baılanys jáne radıoelektrondyq kedergiler jaǵdaıynda áreket etýdi úırenedi.
Aıta ketelik ІІM Ulttyq ulany áskerı bólimderge jasandy ıntellekt júıesin engize bastady.