Arqalyqtaǵy qus fabrıkasyna jańadan qustar ákelinedi

QOSTANAI. QazAqparat – Óńirlik kommýnıkatsııa qyzmetinde ótken baspasóz jıynynda Arqalyq qalasynyń ákimi Qaırat Ábishev «Agroınterqus» fabrıkasyndaǵy qustardyń ólimine qatysty saýalǵa jaýap berdi, dep habarlaıdy QazAqparat.

«Qazirgi málimet boıynsha 360 myńnan astam qus qyrylyp qaldy. Ólgen qustyń barlyǵy joıylyp, tıisti akt qujaty toltyryldy. Arqalyq qus zaýytyna respýblıkalyq bıýdjetten ótemaqy tólenedi. Qustardyń qyrylǵanymen kásiporyn jumysyn toqtatpaıdy. Bul fabrıkanyń Arqalyq turǵyndary úshin mańyzy zor. Óıtkeni 250 adamdy jumyspen qamtyp otyr. Taıaý kúnderi tazalaý, dezınfektsııa jumysy júrgiziledi. Aldaǵy aıdyń sońynda jańadan qustar ákelinedi. Kásiporynmen birlese otyryp, 3-4 aıdyń ishinde qus sanyn qaıta qalpyna keltiremiz. Jumysshylar qysqarmaıdy», - dedi Qaırat Ábishev.

Veterınar mamandar qus tumaýy indetiniń Qostanaı oblysynda buǵan deıin tirkelmegenin aıtady. Búginde óńirdiń 59 aýylynda 130-ǵa jýyq veterınar maman vaktsına egý jumystarymen aınalysyp jatyr.

Sonymen qatar respýblıkalyq epızotııalyq jasaq indet oshaqtaryna aınalǵan mekenderdi dezınfektsııalap, qus ólikterin órtep, qusynan aıyrylǵan otbasylardyń tizimin jasaıdy. Bul tizim oblysta qurylǵan arnaıy komıssııanyń qaraýynan ótedi. Taýyǵy qyrylǵan jeke sektorlardaǵy 2 384 úıge respýblıkalyq bıýdjetten ótemaqy tólenetin bolady.

Aıta keteıik, Arqalyq qalasynda qus fabrıkasyndaǵy jaǵdaıǵa baılanysty Rodına aýyly karantınge jabyldy.