Arhıv qyzmetkerleriniń jalaqysy ósedi — zań

ASTANA. KAZINFORM — Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine arhıv isi máseleleri boıynsha ózgerister men tolyqtyrýlar engizý týraly» Zańy ekinshi oqylymda qaralyp, qabyldandy.

— Búgin biz arhıv isin damytýǵa qatysty zań jobasyn ekinshi oqylymda talqylap otyrmyz. Osy ýaqyt ishinde bul qujat jan-jaqty pysyqtalyp, mańyzdy jańa normalarmen tolyqtyryldy. Olar negizinen salada jyldar boıy qordalanǵan túıtkilderdi sheshýge, arhıv isin zamanǵa saı damytýǵa jáne óskeleń urpaqty aqparattyq keńistiktegi jaǵymsyz kontentterden qorǵaýǵa baǵyttalǵan. Sondyqtan da zań jobasynyń mádenı-rýhanı sala úshin mańyzy erekshe deýge bolady. Óıtkeni, arhıv — ulttyń jady, memleket tarıhynyń qujattyq aıǵaǵy. Muraǵattar salasyn udaıy jetildirip, damytyp otyrýdyń máni zor, — dedi Májilis depýtaty Elnur Beısenbaev.

Zań jobasynyń negizgi novellalaryna mynalar jatady:

— Ulttyq arhıv qorynyń quramyn qala qurylysy, tájirıbelik-konstrýktorlyq, jobalyq-smetalyq qujattamalar, syzbalar jáne olarǵa qosymsha mátindik jazbalar esebinen keńeıtý;

— Qujattardy turaqty saqtaýǵa qabyldaý jáne tsıfrlyq arhıvke ótkizý tártibin retteý;

— Bıýdjet esebinen jasalǵan aýdıovızýaldy qujattardyń mindetti danalaryn arhıvterge tapsyrý;

Eń bastysy, zań jobasyna tsıfrlyq arhıv týraly jańa bap engizildi.

Budan bólek, zań aıasynda arhıv qyzmetkerleriniń jalaqasyn kóterý eskerilgen.

— Ózderińizge málim, «AMANAT» partııasynyń saılaýaldy baǵdarlamasyndaǵy basym mindetterdiń biri — mádenıet, arhıv jáne kitaphana qyzmetkerleriniń jalaqysyn arttyrý. Osyǵan baılanysty, zań jobasynda jergilikti atqarýshy organdardyń rólin kúsheıtýge baǵyttalǵan normalar kózdelgen. Endi, olar aýyldyq jerlerdegi arhıv salasy mamandarynyń laýazymdarynyń tizimin anyqtaı alady. Sol boıynsha jalaqyǵa qosymsha 25 paıyz aqy tólenetin bolady. Sondaı-aq, Qazaqstan tarıhynda alǵash ret memlekettik arhıvterge «Ulttyq» mártebesi beriletin bolady. Bul sheshim Parlament pen Úkimettiń eldiń tarıhı jady men mádenı murasyn saqtaýdaǵy arhıv júıesiniń rólin nyǵaıtýǵa baǵyttalǵan birlesken jumysynyń nátıjesi boldy, — dedi E. Beısenbaev.

Endi ulttyq arhıvterdiń qyzmetkerlerine eńbekaqyny esepteý kezinde 1,75 eselik ústeme koeffıtsıent qoldanylady. Shamamen kelesi jyly Astana men Almaty qalalaryndaǵy eki arhıv atalǵan ulttyq mártebege ıe bolady.