Aral basseıninde munaı men gaz qory bar 20 alań anyqtaldy

ASTANA. KAZINFORM — Qazaqstanda geologııalyq zertteý jumystary halyqaralyq standarttarǵa saı jańa deńgeıge kóshti. El aýmaǵyn zertteý aýqymy 2,2 mln sharshy shaqyrymǵa deıin ulǵaıtý josparlanǵan. Bul týraly Ortalyq kommýnıkatsııalar qyzmetinde ótken baspasóz konferentsııasynda QR Ónerkásip jáne qurylys mınıstrligi Geologııa komıteti tóraǵasynyń mindetin atqarýshy Qanat Erýbaev habarlady.

Onyń aıtýynsha, 2025 jyly izdeý jumystaryna arnalǵan 29 áleýetti alań anyqtaldy. Olarǵa altyn, mys, qorǵasyn, myrysh jáne basqa paıdaly qazbalar jatady.

— Buryn 1:200 000 masshtabynda zertteý júrgizetinbiz. Bul tek jalpy túsinik beretin, biraq ınvestıtsııalyq sheshim qabyldaý úshin jetkilikti dáldik bermeıtin. Qazirgi ınvestor halyqaralyq standartqa saı naqty derekterdi talap etedi. Sondyqtan biz metrlik dáldikpen egjeı-tegjeıli zertteý júrgizetin jańa deńgeıge kóshtik. Bul áleýetti alańdardy erte kezeńde anyqtaýǵa jáne zertteýden ıgerýge ótý protsesin jedeldetýge múmkindik beredi, — dedi Qanat Erýbaev.

Ótken jyly 100 myń sharshy shaqyrym aýmaqta egjeı-tegjeıli zertteý jobalary júzege asyrylǵan. Jobalar keshendi tásilmen júrgizilip, zamanaýı ádister qoldanyldy: jerdi qashyqtan zondtaý, aerogeofızıka — magnıttik jáne gamma-spektrometrııalyq túsirilim, geohımııalyq zertteý (IONIC leaching ádisi), zerthanalyq taldaý, burǵylaý jáne uńǵymalardy geofızıkalyq zertteý.

— Aral basseınindegi zertteýler geologııalyq qurylymdy naqtylaýǵa, jańa elementterdi bólip kórsetýge jáne boljamdy munaı men gaz qoryn baǵalaýǵa múmkindik berdi. Munaı men gaz qory bar 20-dan astam alań anyqtaldy. Bıyl Qazaqstan Respýblıkasynyń Energetıka mınıstrligi osy alańdarǵa jer qoınaýyn paıdalaný quqyǵyn berý úshin aýktsıondar ótkizedi. Sonymen qatar az zerttelgen basqa basseınderde jańa seısmıkalyq barlaý jobalary iske qosylady, — dedi ol.

Osyǵan deıin Prezıdent geologııa salasyn damytýǵa jeke kapıtal tartý Úkimettiń asa mańyzdy mindeti ekenin basa aıtqan edi.