Ankarada Qazaqstannyń Túrkııadaǵy kúnderi ótip jatyr
ASTANA. QazAqparat - 19 maýsym kúni Ankara qalasynda Túrkııadaǵy Qazaqstan kúnderi bastaldy. Ony atalǵan eldegi Qazaqstan elshiligi El Táýelsizdiginiń 25 jyldyǵyna oraı qalanyń Kechıoren aýdany mýnıtsıpalıtetimen birlesip uıymdastyrdy.
Osyǵan baılanysty, Almaty oblysy ákimdiginiń jáne aýdandarynyń basshylyǵy men halyqtyq-folklorlyq janrdaǵy ártisterden turatyn delegatsııa Ankaraǵa bardy.
Túrkııadaǵy saparynyń birinshi kúninde qazaqstandyq delegatsııa Ankarada ornalasqan QR Tuńǵysh Prezıdenti N.Nazarbaev monýmenti men M.K.Atatúrik mazaryna bardy.
Otandyq ártister «Antarez» iri saýda ortalyǵynda óz kontserttik baǵdarlamasyn usyndy. Kásibı sheberlikterin «Adyrna» folklorlyq ansambliniń aspapshylary, «Altynaı» halyqtyq bı memlekettik ansambliniń ártisteri kórsetti.
Búgin Ankaradaǵy saıabaqta Súıinbaı Aronulyna arnalǵan músinniń ashylýy, Jambyl Jabaevtyń 170 jyldyǵyna arnalǵan konferentsııa men kontserttik baǵdarlama uıymdastyrý josparlanǵan.
