Ankarada Alǵys aıtý kúni atalyp ótti
Іs-shara sheńberinde Elshiliktiń qoldaýymen qoǵam qaıratkeri, belgili pýblıtsıst marqum Saǵat Áshimbaevtyń «Ádebı syn maqalalar» jáne tanymal jazýshy Shárbaný Beısenovanyń «Bir mahabbat baıany», «Súzgeniń sońǵy kúnderi» «Bozoq arýy» atty túrik tiline aýdarylǵan týyndylarynyń tusaýkeseri uıymdastyryldy.
Іs-sharaǵa Qazaqstannyń Túrkııadaǵy Elshisi Abzal Saparbekuly, Túrkııa Respýblıkasy Prezıdentiniń Bas keńesshisi ıAlchyn Topchý, Túriksoı Bas hatshysy Dúısen Qaseıinov, Eýrazııa jazýshylar odaǵynyń tóraǵasy ıAkýp Ómeroǵlý, Túrkııanyń memlekettik jáne qoǵam qaıratkerleri, BAQ ókilderi, Túrkııada bilim alyp jatqan qazaq jastary, qazaq dıasporasy ókilderi jáne túrik oqyrman qaýymy qatysty.
Abzal Saparbekuly ataýly kúnniń Qazaqstan qoǵamyndaǵy mańyzdylyǵy týraly sóz qozǵap, Elbasy N. Nazarbaevtyń «Bizdiń ustanymymyz - tatýlyq pen tynyshtyq, uranymyz - bereke men birlik» degen sózderin keltirdi. Búgin sol beıbit ómir men yntymaq úshin, qasterli Táýelsizdigimiz úshin bir-birimizge alǵys aıtatynymzdyń astyn syzdy. Osy rette, A. Saparbekuly qazaq eli atynan basyna qıyn kún túskende qazaq baýyrlastaryna qushaǵyn ashqan túrik úkimeti men halqyna alǵys bildirdi. Elshi Alǵys aıtý kúni maqsatynyń óskeleń urpaqtyń boıyna dostyq, tózimdilik jáne patrıotızm qundylyqtaryn sińirý ekendigin aıtty.
Sondaı-aq, A. Saparbekuly 1999 jylǵy 1 naýryzda «Nur Otan» partııasynyń qurylǵanyn eske sala otyryp, eki kún buryn 20 jyldyq mereıtoıǵa oraı ótken partııa sezinde prezıdent N. Nazarbaevtyń Qazaqstannyń durys damý strategııasyn júzege asyryp otyrǵandyqtan bolashaqqa senimmen qaraıtynyn málimdegenin aıtty. Elbasynyń halyqtyń erteń emes, búgin baqytty bolýyn qalaıtynyn, osy turǵyda áleýmettik damýǵa baǵyttalǵan júıeli sharalardy usynǵanyn jetkizdi.
Sonymen qatar, Elshi Prezıdent N. Nazarbaevtyń ótken jyly jarııalanǵan «Uly dalanyń jeti qyry» atty baǵdarlamalyq maqalasynyń qazaq halqynyń rýhanı jandanýy ǵana emes, jalpy túrki áleminiń birligi úshin mańyzdy qadam ekendigin aıtty. Sóziniń sońynda A. Saparbekuly áıgili ádebıet synshysy S. Áshimbaev pen onyń jary Sh. Beısenovanyń túrikshege aýdarylǵan kitaptaryna qysqasha sholý jasap ótti.
Óz kezeginde, Túrkııa Respýblıkasy Prezıdentiniń Bas keńesshisi ıA. Topchý ata-babalarynyń meshetııalyq túrikter ekenin aıtyp, túrikter jáne basqa halyqtar atynan qıyn-qystaý kezeńde pana bolyp, barymen bólisken qazaq halqyna, sonyń ishinde Prezıdent N. Nazarbaevtyń ata-anasyna úlken alǵysyn bildirdi. N. Nazarbaev pen R. T. Erdoǵandy Túrki áleminiń, jalpy Eýrazııalyq keńistiktiń eki alyby dep erekshe atap ótken ıA. Topchý eki eldiń qarym-qatynastarynyń odan ári damı beretinine senimdi ekendigin málimdedi.
ıA. Topchýǵa Qazaqstan men Túrkııanyń dostyq qarym-qatynastarynyń damýyna qosqan úlesi úshin Qazaqstan Respýblıkasy Táýelsizdiginiń 25 jyldyǵy qurmetine arnalǵan merekelik medal tabystalyp, is-shara kitap tusaýkeserimen jalǵasty.
Tusaýkeserde sóz alǵan Eýrazııa jazýshylary odaǵynyń tóraǵasy ıA. Ómeroǵlý Alǵys aıtý kúni sııaqty mańyzdy merekelerdiń irgeli, uly memleketter jasaıtyn shara ekenin málimdedi. Ol, sondaı-aq, túrli sebeptermen qazaq elinde qonys tepken halyqtardyń tarıhı otandarynyń 1 naýryz saıyn Qazaqstanǵa delegatsııalar jiberip, alǵys aıtý sharalaryna qatysýyn uıymdastyrýdy usyndy.
ıA. Ómeroǵlý «Súzgeniń sońǵy kúnderi» povesi áıel qaharmandyǵyn sýretteıtin shyǵarma dep baǵa berdi. Ol Súzge hanshaıymnyń Sibirdiń sońǵy hany Kóshimniń jary bolǵanyn aıtyp, jalpy, povesti qazaqtardyń tatar jáne bashqurt sııaqty soltústik túrki halyqtaryna qashan da qoldaý kórsetkenin meńzeıtin mańyzdy shyǵarma dep esepteıdi. ıA. Ómeroǵlý «Bozoq arýy» povesiniń túrki áıelderiniń batyrlyǵy men qaısarlyǵyn dóp sıpattaýymen oqyrmannyń esinde qalatynyn aıtty.
Kitaptardyń avtory Sh. Beısenova shyǵarmalarynda ómirdiń qıyndyqtarynan, tipti ólimnen de taıynbaıtyn batyl jáne qaharman áıelderdi somdaıtynyn jetkizdi. Tarıhtaǵy Súıimbıke, Súzge, Bozoq arýy sııaqty tulǵalar men Sibirge aıdalǵan M. Qarataevtyń artynan erip, tireý bolǵan jary Marhýma sııaqty áıelderdiń ishki jan dúnıesin beıneleýge tyrysqanyn aıtty.
Avtordyń artynan sóz alǵan aýdarmashy J. Kynajy jınalǵan qaýymdy shyǵarmalardyń sıýjetimen tanystyryp, «Bozoq arýy» povesin Prezıdent N. Nazarbaevtyń barlyq túrki halyqtaryna ortaq tulǵalardy nasıhattaý boıynsha usynysynyń oryndalýy dep baǵalady. Sóziniń sońynda J. Kynajy Elshiliktiń buǵan deıin de kóptegen kazaq avtorlary kitaptarynyń túrikshe jaryq kórýine qoldaý kórsetkenin eske salyp, Elshi A. Saparbekuly júrgizip otyrǵan mádenı dıplomatııany joǵary baǵalady.
«Baldyrǵan» jýrnalynyń bas redaktory D. Maǵlumov, óz kezeginde, Qazaqstan táýelsizdik alǵaly beri kóptegen qazaq avtorlary kitaptarynyń Túrkııada jaryq kórgenin atap ótip, jınalǵan qaýymdy S. Áshimbaevtyń ómirbaıanymen qysqasha tanystyrdy.
Jıyn Sh. Beısenovanyń túrik oqyrmandary úshin kitaptaryna qoltańba berýimen, sondaı-aq, qazaq halyq jáne estrada ánderi shyrqalǵan merekelik kontsert jáne resmı qabyldaýmen jalǵasty.
